كرونيك ❤️ الحب المشحون ❤️ الجزء الثاني

#الجزء_2
#ep1
هزتني رعشة تسري في بدني الكل ما نعرش يا لندرا خوف من روحي ولا على روحي ... سرحت بأفكاري بقلبي بعيني... وين ماشية؟ وين بش ترصي؟ بش نلقى بر الامان معاه ولا بش نزيد نغرق؟ بش نقعد نتعارك معاه وعلاقتي بيه كر وفر ولا ..؟ هو يبدا وانا نكمل...واصعب الامور بداياتها وخواتمها...وانا في هواجسي حسيت بيدو تحضن في يدي تقلي ما تخافش هاني معاك... ومنين ها الامان وانت معاي ..انت محنتي و حلها انت داي و دواي... قلبي معاك يطلع مرتفعات و يطيح منخفضات... اكيد ما فماش امان معاك ... يا مي لسانك يلزمو يزيد يطوال .... الرخ لا.... وهبلييييه بلا قلو قلبي.... هو بدا وانت وريه اللعب على اصولو ...دانا مي و الاجر على الله ... هبلييه هبليييه يا مي
اول خطوة: نطرتلو يدو وتلفتلو نتسومم _يدك ما تلمسنيش و الزم حدودك ... يمشيش في بالك روحت بي يعني ملكتني.... رد بالك ..ابعدني لا نسودلك عيشتك ... غزرلي وشدو كريز متاع ضحك و قلي: والله عندي ليك برنامج شهر عسل تقعد طول عمرك تهتري بيه ... جاوبتو: قول بصل وزنباع بش نوريهولك انا وين يتباع ...قلي: _يا بنتي يزي راك عروسة نحي عليك المنطق العادم شوية رومنسية ... و تبسم وتلفت للشباك.
العادم شوية رومنسية ... و تبسم وتلفت للشباك.
هو: مانيش مصدق اللي ولات مرتي حقي حلالي...مروح بيها لداري ...بش نصبح على وجهها على غزرة عينيها اللي سحرتني...على رموشها اللي نحب نتخبى فيهم و تغطيني...على شعرها المتمرد ...على ريحتها اللي نحب نتنفسها ليل و نهار ...عليها هي ...ادمنتها ادمنت وجودها في حياتي...حياتي اللي مانيش عارف كيفاش بش تكون معاها...اما اللي متاكد منو انو بلا بيها مانيش حي...ريحة الحنة و الحرقوس ما ابنها في يديها اللي ترعش ...شديتهم حبيت نطمنها اما هي باقي لسانها يتسومم.... يا اميمتي اش بش يقصو واش بش يهدها؟؟؟ كيفاش بش نروضها ؟
انا: يلزمني خطة تكتيتكية ...بش نسلم بسهولة مستحيل....ههههه حاسة روحي هابطة نكور و قاعدة نسخن ...
وصلنا لدار ...وهي دار؟ يا لهويييي ...دانا قبل كدة ما كنتش عايشة... حخش دنيا باركولي يا جماعة ...هههههه

الساعة تحل الباب وحدو وحدو، و ممشى طويل و جنينة منا ومنا ووصلنا لقصر...وقفت الكرهبة، هبط هو وخلاني ...في العادة العروس يهز عروستو وانا؟ يا ناري على روحي... ايا تعاركت مع الروبة و طلعتها و طلعت ...يطلع روحو كيما طلعلي روحي... رجعلي قلي ييتمقصص: _تحبش نعاونك؟ هزيت عيني فيه : _ كتقعد كان انت ما تعاونيش.. و رجعت نهز في الروبة ...السخطة ما ارزنها ...وواوب نلقى روحي مشنقلة بين هوا وفضا وهزني يجري بي لباب الدار وانا نصيح و نضرب: تي سيب .. تي سيبني... الهم هذا ... وهو تقول هاز سرقة هارب بيها .... وصلنا للباب و هبطني
هو: تمنيت نهبطها انا مالكرهبة ، نبوسها ، نعنقها...نقلها مرحبا بيك في داري ..حلالي ...و نهزها بيدي لبيتها و لفرشها ...اما ماني نعرفها شوكتها واقفة قلت سيب علي ...خلي الامور تهدا و كل شي تو يجي بطبيعتو . مشيت وخليتها تتفارع هي و روبتها ما نجمتش نشد روحي و رجعت هزيتها ....
انا: دخلت اش بش نحكي و اش بش نخلي اثاث كلاس روووعة، الدنيا واسعة و عريضة... زعمة بش تكون جنتي ولا جحيمي ...تلفتلي قلي: مرحبا بيك في دارك يا عروستي... و تبسم .قلي: _اطلع لبيتك بدل و اهبط للعشا. ياخي تلفتلو و قتلو: _ وين نعرف عليها انا منين ووين تجي؟ غمزني وقلي:_ تحب نجي نهزك؟ قحرتلو و قتلو: تو نطلعها وحدي لا مزية ليك.
طلعت دروج دائري حلزون ههههه و كان جيت بسروال راني تزحلقتو هههه... اول مشروع لي في هالدار بش نتزحلق على الدروج . البيوت برشا ، اخر بيت في الكلوار في كوان هي بيت نومي.. بيت ملكية ...فرش كان نرقد فيه بش نضيع .. مفروش بفرش عرايسي فرشتو حماتي و امي يسخايلو ليلتي ليلة .... اما هي بش تتعدى ليلة كلبة على راسي .. و زهيرة قتلي و وصاتني قبل ما نخرج للحجامة قتلي : _هاني حطيتلك الامانة على الفرش استحفظلي عليها... لقيتها الامانة سورية نوم بيضا ههههه حطتهالي زهيرة يقوى عليها ربي ما زالت تفهملها... حليت الدراسينغ صدقوني كنقلكم يخبي عباد موش عبد ...ههههه قلت كان نتنت و اتخذت عندي وين نتخبى ...مديت سيرفات ..نحيت اك الروبة ( ديما نلقاهم يتفارعوا هوما و سلسلة الروبة و العروس يجي ينقذ الموقف هههه) اما سلتها بسهولة تقول حمل وانزاح ووالله كنقطعها لا نعيطلو نقولو نحيهالي.... الوحدة تعمل بيديها وتقول كيفاه...
ايا ما نطولش عليكم الهدرة دخلت دوشت دوش عالمي بيت بانو تهبل ...نسيت روحي و الوقت فيها كان موش الشر قتلني واما مع كرشي ما نعرف حد...
هي: لبست سيرفاتي في بيت البانو بش لا نخرج عريانة لا النار تقدح لا وذني ...ابعد عالشر وغنيلو ...تقول زهيرة اش لز حمة يغني...مانيش فاهمة علاه بدني رافض انو يرضخلو و مخي رافض يسلملو و قلبي يرفرف يقول ما صابو يقربلي و يبوسني و يخبيني عندو تو ننسى و تطيب جروحي منو... اسواري كلها تتهدم قدامو ...بيني و بينكم مرهونة في تذبيلة عويناتو ونطيح ما في عيني بلة هههه.... يزي يا مي راهو سرقك راهو بهذل بحالك ...والله كان تطيحلو لاك عبد ...حرب و اعلنها هو ... و قلبي يقلي راهو راجلك حلالك راهو الحب كلو...سلم يا بنتي وخش دنيا....هههه .عركة بين قلبي و عقلي...لميت روحي و قلت ايا نخرج نتعشى الساعة و بعد يعمل الله دليل ...و استعنا عالشقا بالله..
هو: قلبي يعزق نحب نطلعلها نشوفها .. طلعت نسمع في حس الما عرفتها تدوش..وسوسلي شيطاني بش نهد عليها الباب و ندخل ..و بطلت ...نحب كل شي برضاها ...نحب نرى الرغبة في عينيها و نحسها في دقات قلبها ...نحبها تقلي بفمها اللي هي تحبني و ترغب في ...اما حاسس روحي نحلم ...هي كرهتني على خاطر هددتها و غصبتها اما خلاتليش خيار ...نعمل كل شي و لا اني نخليها لحد اخر... دوشت و بدلت وهبطت حضرت العشا اللي طلبتو و قعدت نستنى في للة الحسن .
مي: شيحت شعراتي. هبطت في شطر الدروج خطرلي رجعت نحب نتزحلق من اولو ... ايا طلعت و انطلقت من اولو لاخرو وانا نصفر و نضحك سعادة موش عادية ...ما وصلت الا نلقاه واقف مربع ايديه يتفرجلي لا تفهمو يتبسم لا يقحر ... المهم عملتها شهوة صبية ههههه
قلي:_ لا حلو ...مرا و عليك الكلام... ما نجمتش ما نجاوبوش نكد علي فرحتي: _مرا و نص وكان عجبك هذاك اللي فمة ..ياخي ما نفيق بيه كان لوالي يدي لتالي وحصرني في التركينة و قلي: _ ما عادش تستفزني بش نعيشو مع بعضنا رايضين طيح شوية ما كانش والله فمك اللي ما يتسدش بش نهدهولك...
حسيت روحي فشلت خاصة كيف ريت في عينيه لمعة متاع خطر...متاع تنبيه رد بالك تزيد تقدم ....
هو: نتفرج فيها كيف هابطة تتزحلق ...مانيش عارف روحي خذيت مرا ولا فرخة صغيرة ما زالت تنقز...و زيد تصفر ....عزري. ..لا خذيت و ربحت يا ايمن ....والادهى لسانها راهو غلب علي....باز بش تاكل بعضها بيناتنا كان ما تنقصش..ما يجيبها كان التهديد ولا حاجة اخرى....اللي بالي بالكم...ههههه
هي: ايا طفيت الضو ونعلت الشيطان قلت خليني نتعشى الساعة بش كان فمة عركة نكون في فورمة...وغطست في الماكلة امممم بنة عشا عرايسي ....متاع عركة بالرسمي...وهو قاعد يتفرج في يتعشى ولا يزمر... كملت لميت و خملت الدنيا وجيت طالعة وهو قلي:_اوووو وين على خير؟ انا:_لبيتي ...هز حاجب و قلي:_حتى انا بيتي راهو هههه والله ماني عارفة ليلة كلبة واش بش يعديها هههههههه
تلفتلو:_شنوة بابا؟ لا بيتك لا والو لبيوت ياسر فركس وين تبات ما كانش نخرج و نخليهالك واسعة و عريضة.... المسافة اللي بيناتنا عداها قفز والله..في لحظة كان قدامي شدني من يدي الزوز لتالي كبس عليهم بيد بركا و اليد لاخرى .....ووووه ....السخانة طلعتلي ...حطها في شعري و بدا تقول يبنن بيو صوتو ولى همس بش يذوبني: _ ونهون عليك ليلة عرسي نبات لبرا؟؟ انا نمهمه و صوتي ضاع ...زاد عمل بلعاني و هبط بيدو على وجهي سرح بصوابعو في خدودي ... على عيني...على خشمي ....على شفايفي.....
كنت بش نتكلم صوتي ما لقيتوش.... النفس تقطع علي .... وهو باقي يتكلم:_ انت راك مرتي ...حلالي ... ما تاخوش في خاطرك مني علي عملتو... ما لقيتش كيفاش ....ما خليتليش حتى حل...انا نقرب وانت تهرب ...انا نعارك وانت تزيد تكملها....اعطينا فرصة نكونو اصحاب....و نوعدك ما ناخو شي منك بالغصب...خوذ راحتك معاي اما خليني نزيد نقربلك....
انا مانيش مصدقة اللي ايمن يتكلم معاي هكاكا .... وين تسلطو؟ وين قوتو؟...حسيت روحي مع شخصية اخرى ...كل شي فيه هبلني ....نبرة صوتو...لمسة يدو. ... همساتو ....قتلو:_ اقرصني .... ضحك وقلي :_ نعم؟ قتلو:_ اي اقرصني هذا انت ولا انا نحلم؟ طرشق بالضحك وقلي: _ زايد ما تكسابش قرام رومنسية ...ايج نعلمك... وعنقني بالقوي...خباني في شونو ....تعنيقة بكلها حب و حنان و قوة وغطرسة... قتلو: _سايس بش تكسرلي ضلوعي .... الله غالب لساني ما يهنيش...
طفاني و بدا يبوس من شعري. ... لجبيني .... قلبي دق. ... و الكلام هرب ... ومخي قلي اهرب شنوة بش تسلم من كلمتين ...بديت نتملص و هو زاد كبس علي... ما لقيتش كيفاش اما يلزمني نهرب قبل ما يوصل لفمي... دزيتو وهربت نجري...و نسمع فيه يضحك و يقلي:_اهرب اهرب ما عندك وين تتخبى مني..
طلعت للبيت بكلي نرعش ...و اعصابي تقولش تخدرت....ضيعت الاحساس...زعمة اش بش يجرى؟ بش يخلط علي و يبات بحذاي؟ لا لا مستحيل ...انا وياه فرد فرش ؟؟ نمشي لبيت اخرى و نخليه.. هذاكا اش قررت ... سكرت الباب بالمفتاح الساعة وانا نضحك في قلبي ...يبطى شوية قلو ترقد في بيتك... سلت اك السرفات و جبت نويزات روج حلوة تي انا و عجبتني روحي ..هههه... لبستها و سيبت شعراتي و قعدت ندور في البيت عاجبتني روحي ...انا هكاكا و نسمع في الباب اللي بحذا بيتي اتحل ...قلت هذا سلم امرو لربي و بش يبات في البيت لاخرى ... و يا فرحة ما تمت ...نلقاه داخلي من باب بيت البانو ... وانا ماني ما زلت ما نعرفش الدار ...الزوز بيوت هاكم شركة في بيت بانو وحدة ...اهه فسدت ليلتي... الساعة انا واقفة في شطر البيت عريانة نتسمى ما لقيت في روحي ما نلم ...وهو عينيه نغزرلهم بش ياكلوني ...صفر تصفيرة طويلة وقلي:_ شنية هالزين الكل؟ وين كان مخبي؟ هذا الكلو لي ....و بدا يقدم ...وانا نوخر ...يلزمني نفصع ...تلفت نجري للباب بش نحلو ...السخطة بالمفتاح... ما دورتو انا الا ما هو سايي خلطلي ... ولقيت روحي ما بين يديه و الباب وراي مسكر.... اين المهرب؟ العدو من امامكم و البحر من ورائكم يا مي؟ تخربت على راسك...
هي: يد منا و يد منا، الباب وراي وهو قدامي ...عينيه طالعة هابطة على بدني ...نفس سخون يحرق خارج منو...نسمع في نبضات قلبو عمال و تقوى...و انا دخلت بعضها الدنيا عندي...حسيت بشوق لاني نختبر مشاعري معاه...نحب نعرف وين نجم نوصل وانا بين ايديه...في قرارة ذاتي تمنيتو يقربلي ...
هو: ما كنتش ناوي نمسها حتى ترضى ، اما تسكيرتها للباب و هروبها مني حسسني باثارة بش نخلط عليها...دخلتلها من وين ما تتوقعش...و شفتها بالنويزات نحس في مخي طار مني ...ما عادش يحركني كان احاسيسي ...يلزمني نقربلها...يلزمها تحس بي و بحبي ليها...
هي:_ بربي ايمن لا تمسني..مش قتلي برضاي؟ انا ما نحبش توة .خليني نستانس بيك و خلي كل شي يجي بطبيعتو. هو:_هاو كل شي جا بطبيعتو..اغزر لروحك وقلي كيفاه نجم ما نقربلكش؟ كيفاش نجم نشد روحي عليك؟علاه تعذبني؟ علاش تحرمنا؟ خليني نذوقك حلاوة الحب ...و بدا طالع هابط بشفايفو يتحسس في وجهي ...وانا ريقي نشف يشيح ريقو ...وقلبي يعزق عدو سمع النهج الكل...درا كيفاه خرجت مني و لقيتها ....عضيتو وخليتو يصيح و هربت ...ههههه
خلط علي و شدني في الدروج وهو يصيح: _والله ما نوريك يا مي...تو تشوف شنوة نجم نعمل ... كنت نجري مش متلفتة وراي اما حاسة اللي هي اتخذت و مزمرة على راسي...شدني ...و هزني وكابس علي و يتحلف ...عرفت ما عاد عندي وين نهرب ... قلت نجيبها بالسياسة ...يلزمني نبدل السيستام ما كانش بش ياخو اللي حاجتو بيه بالغصب...قتلو:_ باهي ايمن سيبني وراسك نركح ...بربي امانك والله نقعد رايضة و ما نعملك شي
سيبني ...اعطني حريتي اطلق يدي ....ههه قلي:_هاني سيبتك بوسني ..عيني وساعوا: شنوة؟ قلي:_ شنوة نرجعو للقوة؟ سيب روحك و بوسني... وقفت على طراطش صوابعي..هو اطول مني و بستو على خدو ،ياخي قلي: _لا مش من غادي من فمي.... قتلو:_بربي ايمن لا سكتلي فمي و عملي حركة بعينيه و هو شاددلي ايدي معناها ازرب روحك و ما تناقشش...امري لله نقدم لشفايفو و مترددة ...يا ويلي من بوستو و توابعها...انا ما زلت كي وصلت لفمو و هو لصقني و البوسة اطوالت...بدات بالغل و يعد ولات حنينة و محمومة ...لقيت روحي من غير ما نشعر ملهوفة عليها ...نحبو يكمل ...يزيد يتقدم...و هو قص ...وخر و حط يدو في شعرو:_ انت بش تقتلني...و صوتو ابحاح وكمل :_ عمري ما رغبت في مرا كيفك... جننتني والله ...برا ارقد فيسع لا نبدل رايي....ما صدقت لربي هربت لبيت البانو.
خرجت نلقاه خرج تنفست نحيت اك النويزات المحنونة لبست بيجاما و دخلت للفرش مالتعب رقدت ...و ما نعرش عليه لا وينو لا كيفنو .
هو: مخي طار مني كان بش نقعد نرى فيها اكاكا بش ترصي في اغتصاب ..خليني نخرج خير .هزيت روحي و مشيت خرجت الكرهبة و درت درت حتى عييت و روحت .بدلت و رقدت في البيت لاخرى بعد ما طليت عليها راقدة ملاك...وهي ماهي نومها ثقيل ما حست بشي.
هي: قمت الصباح نفركس على روحي وين...بعد بش رجعتلي ذاكرتي و تفكرت ليلتي المحنونة ...ما زلت نتكسل و ايمن دخل :_ صباح الخير يا عروسة. ولساني اللي ما يتسمى قلو:_ ياخي ما علموكش تدق الباب؟ ضحك وقلي :_ لا حلو في داري و نشاور وندق ...ايا قوم بلا بخل عنا وين ماشيين .. عيني لمعت و قتلو:_ يا وين؟ قلي حضر فاليز ماشيين جمعة لفرنسا ..قمت نصيح و نقز على الفرش:_ ولييييييي و هبطتلو نجري بستو: _ ربي يخليك لي...قعد باهت و يتبسم:_كان جيت نعرف بش تبوسني انت راني مالبارح هزيتك ...ههههه
ايا نجري لميت فاليزتي و نسيت كرشي ...هههه موش عوايدي. دخلت دوشت و بدلت ،هبطت للكوجينة نلقى الفطور حاضر ماهو طلع عندو خدم و حشم هههه سعدي سعد... ايا فطرت و هو طل محلا طلتو قلي:_ حاضرة جاوبتو براسي اي.هز الفاليز و قلي ايا عاد ما عادش بكري على طيارتنا...محلاها كلمة طيارتنا وانا حدي الكار الصفرا غلبت علي و كان ترفهت تاكسي الحاصل مالاصفر ما خرجتش.... خرجت وراه طلعنا في الكرهبة و انطلقنا نحو اسبوع العسل ههههه
ايا يا سيدي وصلنا للمطار كنت نراه في التلفزة و نرى لعباد وين تاقف تستنى ولا تسلم ....انا طول طول بش نفوت اك الباب و نركب ضربة وحدة هههه والله صحة لي ....و ربي يعطي لكل بنية...ايا تلهى في اك الاجراءات و طلعنا في الطيارة .هوما قالوا البسوا الاحزمة رانا بش ننطلقو وانا استلبست
من غير ما نشعر شديتو و كبست على يدو وهو يضحك علي..بديت نتمتم و ندعي تقول سايي الدنيا وفات ..زدت غرست ظوافري فيه ندبتلو يدو وهو يبلع و يغص هههه.....غصرة و اتعدات . وهو يطمن في: _ ما تخافش يا مي هاني معاك...وانا قلبي بالدقداقة ...ما اتهنيت كان ما قالو سايي خرجت الطيارة ... ايا بدا يجبد في الهدرة معاي وقلي: _مي احنا بش نعديو جمعة في لوتيل بش نحوسوا و زيد بش نعرفك على عايلة امي... نحبك هادية و رصينة و نقص من لسانك...قتلو: _ بلغة اخرى نهني على روحي ....قلي :_ زايد والله توة كنت نوصي فيك .باهي ارتاح حتى نوصلوا السفر يتعب راهو و انت عندك برنامج الليلة وكل ليلة ..بلعت ريقي بالسيف و تلفت للشباك نتفرج في السحاب و الدنيا من فوق حتى رقدت و باقي يدي في يدو....اول خطوة للاسر
فقت على يدو تهز في شعري من على عيني مع بوسة خفيفة على جبيني ...جات العين في العين ...عينيه مليانة ببرشا كلام يسحرو من غير ما يتكلم...وقلي: _ ارتحت شوية؟ هانا قريب نوصلو . جاوبتو بايه و عاودت رجعت اتكيت عندو، يدو محوطتني محسستني بالامان ...وانا معاه حتى شي ما يخوفني و لا يحركني...قلت خليني نستمتع باللحظة في الدار ولا في البيت ما نجمش خاطر بش تكون وراها توابع و انا مانيش مسلمة...هو زاد كبس علي وانا وين تلقاوني...من لمستو بركا نخوض هذا عالبر مالا في الغريق اش بش يجرى في؟؟
ايا وصلنا هبطنا نلقاو كرهبة تستنى فينا مشينا للاوتال...ملي دخلتلو وانا فمي محلول طاقة..شي يدوخ يا جماعة والله ...طلعنا للبيت وهنا كانت المصيبة ...فرش واحد وانا وياه...ملي ريتو ما ريت خير نحس في روحي غصيت وهو فهمني وولى يضحك... بركت على الكنابي بجنبو و ما نجمتش نعمل شي
بدا يتضومر: _شبي عزيزتي؟ ماك كنت لباس؟ و يتبسم في تبسيمة متاع شماتة اي اكهو عاد ولساني الموذي نطق: _شنوة توة؟ ياخي تتبهلل ولا شنية هدرتك؟ مالقيت حتى بيت كان هكا بفرش واحد؟ جاوبني: _ يا بنتي يهديك رانا عرايس اليا بش يعطيونا بيت بفرش كبير...شنوة هوكا واسع و عريض انت خوذ شيرة وانا شيرة...ههههه قتلو: _ تقول انت نعملو فرضاوي ...باهي ..وسكت على روحي
طفيتو وتلهيت نركح في الحوايج وهو اتمد يتفرج علي ... ريقلت الجو ومديت بيجاماتي ومشيت لبيت البانو دوشت و بدلت و خرجت...غزرلي يتمقصص:_ صحة صحة يا عروسة حمام العرس اللي بالي بالك يا رب ... ودخل هو يضحك. .. اتمديت قلت خلي نرتاح مادام سيادتو يدوش و يلزمني نتكتك لحل لهالمصيبة اللي ما جاتش على بالي..
نسمع في الما يصب عليه و هو يغني زاهي.. ماشية معاه يا سيدي ...تعيا وانت تقبض قلو برنامج كل ليلة...تو نلقى حل لازم...انا اكاكا و هو خرجلي لاف منشفة تي قول ربع منشفة عيطت عيطة وحدة وغطيت عيني بيدي...قام يضحك بش يطرشق نطقت: _اسمعني احترم روحك شنوة خارجلي عريان؟ تي ماو البس في بيت البانو...ملا حالة هذي...و باقي عيني مغطية و نسمع فيه يضحك ويبربش بش يلبس...ما جاوبنيش قتلو:_ لبست؟ قلي: _ لا ما زلت...قعدت ننفخ بالغزول وهو مولى الدار موش هوني على اقل من مهلو...بالشوية و نحس بحثلة على الفرش...
هزيت راسي نلقاه فوقي بالضبط راكز على ايديه ...صدرو عريان ...يا ويلي و يا طول ليلي وهو عينيه تحوس في بدني الكل...خدودي حمارو مالسخانة اللي طلعتلي...تربثت وقتلو:_ ياخي شبيك؟شنوة ناوي؟مش قتلي اصحاب حتى نستانسوا ببعضنا؟ جاوبني:_ اي اش عندي عملت انا توة؟ قاعد نمتع في عيني بزين مرتي...وزيد اشبيه اصحاب ماو نمسك نبوسك ...مالا بش نقعدو فرايجية على بعضنا؟ قتلو:_ اسمعني ما تفاهمناش هكا راهو .. جابني:_انت يزي من عنادك ...وسيب روحك خليني انا نتصرف ..يا بنتي راك مرتي متاعي حلالي...كان نحب ناخو بالقوة راني ناخو لذا اتهد و ريض....هو جا بش يبدا و انا اتفكرت ككنت صغيرة نقرا في المكتب كيف يبدا المعلم بش يوكلنا الطرايح نقلو سيدي نمشي للتواليت؟، نمشي نبرج و نرجع ما كانش ترصيلي نعملها في حوايجي مالخوف...ههههه... قتلو:_باهي خليني نمشي للتواليت امان ...تو نرجع فيسع... تنهد ووخر...نقزت نجري لبيت البانو دخلت و سكرت بالمفتاح ....ههههه ....منعت
قعدت ورا الباب نسمع فيه ماشي جاي في البيت ....ههه يسخن...الصبر طيب... ايا استبطاني وانا ضربة اثنين نسيب الماء ...دق الباب و صوتو ذبال: _هيا مي!! طولت راك...وانا بالعة السكينة بدمها... مشى عاود رجع:_ايا شنوة توة؟ بش تخرج ولا نهد الباب؟ عارفك عاملة بلعاني...ياخي شتبات في بيت البانو؟ ياخي نطقت:_ اي في بيت البانو ولا بحذاك...نسمع فيه ينفخ... مشى جا مشى جا ومنها قالي: _اوكي بونوي... ايه ارتحت
هو: كنت نمني في روحي بليلة ولا الف ليلة ...قلت الليلة نطيحها بشوية بشوية...الساعة فرحت كركحت عندي في الطيارة ولو اني شواتني بضوافرها...اما نومتها عندي محلاها...طمعتني كقعدت عندي حتى كي فاقت...قلت هداها ربي ...تو بشوية نجيبها...احنا وصلنا وهي رات الفرش و بدات تتسومم...تحبني ناخذلكل واحد بيت ..تو هذي في مخها ولا شنوة؟؟ هاني باقي نوسع في بالي اما نهارة اللي بش نطرشق بش نحربها...راني كل حاجة في مشتاقتلها،حتى مالنفس متاعها نعشقو...نحبها و نحب حتى هبالها ...كيفاش بش نعمل معاها...مالقيت حتى حل كان نسايسها...خرجتلي من بيت البانو مغمومة بكلها...عزري مش قلتلكم...زيد تعارك كيفاش نخرج اكا من بيت البانو؟ وهي هي فلتت من بين ايدي...خليها ميسالش تطيب سلة سلة
هي: قعدت في بيت البانو حتى بات الحس... بعد سمعت الباب اتحل و تسكر الروم سرفيس جابوا الماكلة... قلبي عصر علي بالشر عدني بش نبكي...كنتفكر اللي هو غاطس ياكل وحدو قلبي يوجعني....ايا بات الحس جملة ...حليت الباب بشوية تقول نسرق وخرجت شطر راسي نطل ...قابلني راقد على الفرش ...ما يهمنيش فيه قعدت نلوج على الماكلة وين...نعبي كرشي الساعة وبعد نرجع لمخبئي....ههههه خرجت على طراطش صوابعي.....اسس الحس لا.....نلقى طاولة تركب ستة و ستين كيف ...انا شمرت ايديات البيجاما وهو قلي صب الزيت. ..نلقاه واقف قدامي مربع ايديه....
هههههه كهو ما عادش فيها تشديت بالكمشة....قعد يقحرلي و قلي: _ايا هاك جيت بساقيك قتلو:_ موش رقدت ياخي انت؟ لا ترتاح و لا ترتح خلق ربي؟...قلي: _يجي منو هو نتعشى و نرقد ومريتي في بيت البانو؟ ما زالش عندي ما نقول؟ بكشت والله طلعني انا نعمل في العيب وهو جنتلمان ومحلاه واك الريق... فهمتو يركح في ....ميسالش تو نركح هههه اما الا ما نطيبك انت يا ايمن يا ولد....سلة سلة هههههه
هو: استنيتها كالبهلول تخرج وانا نار شاعلة في جواجي ...قلت نبرد بالمشي و الجي في البيت...جا العشا و سيادتها مش ناوية تخرج...والله بش تجلطني...قلت باز تستنى في نرقد ايا خلي نمثل النوم كقدر علي ربي و خلي تخرج ....وفعلا خرجتها كرشها عارفها ....المفيد ما تبات كان عندي
هي: ايا قعد بحذاي لاصقني و بدينا نتعشاو...فقدت تركيزي مع الماكلة كي هو في جنبي...رصاتلي ما طعمتش العشا ...وزيد حسيتو مبلبز موش ماكلتنا المحرحرة جوي ...خواطري دارت ...وخرت ....وهو يقلي:_ يا بنتي كول ...قتلو:_لا مش بنينة معدتي وجعتني...قص عالماكلة و قلي:_متقلقة؟كان تحب نطلب عشا اخر و نجيبلك دوا؟ قتلو: _لا ما تقلقش روحك باز مالسفر تو نتمد شوية و نرتاح... مشيت غسلت ايدي و هو يتبع في و حاير...حسيتو خايف علي ...قلي:_برا اتمد على الفرش ما تخافش ما نقربكش...مشيت تمديت ما صدقت لربي زهري يبس في بيت البانو....هههههه. ياخي شدني الردان نجري لبيت البانو رجعت اللي في معدتي الكل ودموعي تصب و خنايني وحالة مكربة في حتى من ركايبي تخلخلو .....هههه ظاهرلي دعاه طاح في...وهو وراي شاددلي شعري و يبلي في وجهي بالماء ... كي كملت و غسلت هزني هو للفرش ما عادش في ...جابلي برفان بش تفرهدني شوية و جا اتمد في جنبي...تقولش علي تلسعت .نقزت بش نقوم وهو شدني: _تي اترص هالهم حتى بش تموت باقي هاربة ...ايج هنا ارقد عندي و ما تخافش ما نعملك شي...غزرتلو وقتلو:_ اي عندك الحق حتى هو ردان و خناين...قلي:_تو تسكت و ترقد خيرلك...بلعت و اتكيت عندو ....اتلهوث علي كالقرنيطة وبدا يعدي في ايديه على شعري...بالشوية بالشوية حتى رقدت...
هو: والله سخفتني كي بدات ترد ...وجهها اصفر و لخلخ...ومنظر فيها بدموعها و خناينها...وترعش...اما والله نحبها... حبيت نخبيها في شوني فماش ما تحس بي...ما حبتش تعطيني فرصة ...نحب نسمعها شوية كلام حلو ...نحبها تحس بحبي ليها...بحاجتي ليها... يلزمني نلقى الفرصة ...نهدها بالمحواس في النهار بش تتهد في الليل...هذاك دواها... رقدتها عندي ..محلاها كي راقدة تقول بنية صغيرة ...زادت لصقت في و مكبشة ...دفا من بدنها مش عادي ...بدنها طري يغري بش نعدي عليه ايدي الكل...ريحتها خدرتني...حسيت النفس قوى ...وبرشا حاجات بداو يتحركوا في داخلي ...بستها كتهنيت اللي غطست في النوم ...وقمت تكيفت سيقارو ...اثنين...ثلاثة...نتفرج فيها و نتكيف...مخي تحرق و اعصابي تلفت ... وهي مولى الدار موش هوني...انا اللي نحب عليه ايجيني رصاتلي نحبو وحافي بش ناخوها...وما زالت متمردة علي...يعمل الله دليل يا مي يا بنت زهيرة..
هي:قمت الصباح نتكسل وتفكرت اللي صار البارح ...حليت عين وخليت لاخرى نثبت في وضعي...لقيت روحي وحدي....تنفست وحليت عويناتي ...لا وزيد تكعبرت في الفرش نستمتع بكبرو ..ديما فرحتي ما تكملش نلقاه يتفرج في....قلي:_صباح الخير ظاهرلي قمت لباس اليوم.قتلو وانا حاشمة على روحي:_صباح النور اي الحمد لله ارتحت .قلي:_باهي برا حضر روحك بش نفطؤظرو و نخرجو نحوسو...قمت عجاجة :_باهي دقايق و نحضر...عدى يدو شعرو كالعادة و قلي:_هاني نستنى فيك. ايا لحظات دوش خفافي و لبست فاست و جيب قد قد و شوميز فلوي و طباط نوار طالون مع شوية ماكياج وهو خرج لابس من بيت البانو...هو يغزرلي وانا نغزرلو ...حشمت وهو جاني وعنقني ووشوشلي في وذني:_صحة لي عندي مرا كيفك...الليلة ليلتك ما عندك وين تهرب مني.. معدتي دارت وقلبي تخلع...ديما يفسد علي فرحتي ...هو وخر و انا قتلو:_هيا عاد ما عادش بكري...عارفني نتهرب.شدني من يدي و خرجنا.
فطرنا في الرستو و هو يحاول يحكي معاي ولقيت روحي منخرطة في الحديث معاه ...خرجنا في الكرهبة ،موزيكا عليت فيها ، مرة نغني مرة نصفق مرة نصفر وهو يضحك شايخ علي و ساعات يغني معاي...حوسنا واتمتعت لحقيقة ...شريت برشا شكلاطة ...داي في كرشي الله غالب ....شرالي هو برشا لبسة برفان اكسسوار ...غرقني...وانا شايخة عاملة جو...حكينا في برشا مواضيع ...لقيت روحي على راحتي معاه ...اسرني بحديثو...بحركاتو...بيديه الطويلة والفينو...بغزرة عينيه اللي يذبلي فيهم...حسيت روحي كينا كوبل تخلق لبعضو...و بدا قلبي يلين...ويقلي سلم يا بنتي ...سلملو ...عيش الحب معاه...غزرت لشعرات صدرو...وتمنيت نمد يدي و نمسهم...حبيت نبوس صوابع يدو واحد واحد...حبيت نبوس عينيه ،خشمو...وانا سارحة وصلت لشفايفو...حسيتها ترف....عرفتو فهمني في شنوة نخمم قلي:_ما تخافش ما عندك وين هاربة الليلة ...
وووه علي...شنوة الحل الليلة؟ مانيش مسلمة يلزمني نشعفو...شنوة ليلتين اكهو و ياخوني بسهولة....لا هو عذبني الا ما نخلص منو جبل الدوسيات اللي خدمتهم...الا ما نخلص الشر اللي كلاني في جرتو...الا ما يخلص تلبيسي سرقة ولا خيار العرس... الله غالب ما نسيتهالوش ...قتلو :_ايييي معدتي توجع في .قلي:_ههههه موش الليلة زادة .قتلو:_والله بالرسمي واحنا مروحني وقفلي في فرماسي ناخو دواي مستانسة بيه.قلي:_باهي اما والله ما عندك وين تهرب مني كيبدا اندرا شنوة الليلة ليلتنا...ايا كملنا مع الدنيا بدات تظلام... روحنا.
هو:_ استمتعت معاها ...ماهياش عادية والله فلتة...شعرها طاير يتماوج ...تغني و تصفق و تصفر...العزري متاعي...حبيت ندللها ...واللي بهتني ما طلبت شي كان الشكلاطة ...هههه داها في كرشها مش قلتلكم...حوسنا ...حكينا ...تمتعت حتى بشريان حاجات ليها... وبنيت امالي على ليلة عالمية و ما كنتش ناصور بش تعملها في...
وقفنا على فرماسي قلي:_هات اسم الدوا خليني ناخوهولك. قتلو:_لا تو نهبط انا خاطر بش ناهو حاجة نسائية. و نتحوشم...هههه عاملة بلعاني الغاية تبرر الوسيلة...مدلي الفلوس و بستو على خدو وهربت...نطيب فيه...الله غالب...شيطاني ديما حاضر... قلت للفرماسيان عندي مشكلة نوم خاطرني في الغربة وبديت نمثل عطاتني دوا قتلي ضربة ضربة للنوم.هههه...و ما نسيتش دوا المعدة و السرفيات الحاجة النسائية بش ما نتشدش بكذبتي.. وخبيت حرابش النوم في صاكي بلقدا و خرجت..
هي: ايا وصلنا ساكتين بقية الطريق كل واحدفينا سارح بافكارو...طلعنا كالعادة دوشنا وبدلنا .. وقت دخل هو لبيت البانو طلبت العشا مع عصير واكدت عليه...حضرت العشا و كاس عصيرو ذوبت فيه الدوا ...وبش تكمل المسرحية لبست نويزات طويلة بيضا بفونت للفخذ... مكيجت قالىشنوة ليلتي....خرج من بيت البانو لابس ماني نبهت عليه ...قعد باهت وحال فمو...مالا وينك دانا مي و الاجر على الله...جاني يجري وانا نتبسم شايخة عليه وعلى اللي بش يجرى فيه....ايا عنقني ...قول عصرني...وباسني من جبيني وهو بدا بش يهبك وانا قتلو:_نتعشاو الساعة...قلي:_خلي بعد ...انا جيعان لحاجة اخرى. .. ذبت ...والله كان يفيق بي ما يقتلني...ههه... قتلو:_لا ما نفهم شي نتعشاو قبل. سلم امرو لربي وشدني من يدي ...هاو مرة يوكلني ومرة انا نشربو ....ههه حتى سايي .. هو يقلي يزي وانا نقلو لا والله ما تزيد على خاطري...ما كملنا كان ما مفعول الدوا بدا...قلي: ايج للفرش...مشينا وهو موش قد قد... ما تمدينا ما حطني عندو كان رقد...هههه امي مسافرة وهعمل حفلة... تهنيت منو الليلة و رقدت ...
هو: موش مصدق الحنية اللي هبطت عليها و لسانها اللي يقكر عسل...نكذب و نسي و نقول لا باز راهي حست بي ... فقت كان الصباح و راسي في حالة...وهي راقدة بحذاي ما صدقتش...انا رقدت و ما عملت شي؟ قعدت نراجع في روحي ...الفرماسي، الدوا، العصير اللي تلحلح بي بش نكملو و ريحتو خايبة....مخي ضرب...قمت نجري نفركس في صاكها...انا ساعات نخدم ليل ونهار وما نرقدش...نرقد اكا بسهولة ....وهي تتروطب...والله فمة حاجة...حليت صاكها نلقى دوا مخبي خاطي دوا المعدة و السرفيات...جبدتو حليت نوتيس وقريت...ههههه ....صار رقدتني...يقوى عليها ربي مي بنت زهرة....وراسك الا ما نوريك الويل ...جاية تحبو تحت من يمرد....ههههه والله عداتها عليك يا ايمن بن....
قمت نتكسل الصباح ..صبح علي و يتبسم...وبعد قلي:_مي ياخي انا كيفاه رقدت؟ما عملت شي؟ تكبست و قتلو:_،لا فيسع رقدت انت.خسارة قداني ...نتبهلل ...جاني وقلي :_ ما تتاسفش نعوضوها توة...طرت مالفرش قتلو:_ لا عاد مش قتلي اليوم بش نتضيفو عند امك وخالاتك شيجيوا؟ قلي:_باهي هيا حضر روحك مالا...وهو في قلبو:والله ما نوريك يا مي ...
ايا حضرت روحي كيف العادة .لبست روب طويلة روج شراهالي هو البارح و ريت اللمعة في عينيه كقستها..لميت شعري لفوق ماكياج خفيف و خرجنا بعد الفطور...يسوق و عينيه ما هبطتش من علي و انا عاملة مولى الدار موش هوني....الحقيقة ندمت على اللي عملتو البارح و ما ندمتش ...اما وين عندي نهرب منو...ياخي بش نقعد نرقد فيه ديما انا؟ شنوة الحل؟ تنهدت من غي ما نشعر ..ياخي قلي:_شبيك مي؟ قتلو:_لا شي شوية رهبة مالرونكونتر مع الجماعة... شدلي يدي وقلي يطمن في و قلي:_ ما تخافش ما نخليكش...وقعد يد يسوق بيها و يد شادني بيها... ندمت لحقيقة مع حنيتو...و زدت عنقتو واتكيت عندو.. هو تفاجا...اما انا حسيت روحي سايي والله غرقت في حبو....اسواري تهدت ...وما عادش نحب
وصلنا ...فرحوا بينا ..فاميليا متاعو محلاها ...كان وحدة بنت خالتو تتسومم ظاهر فيها كانت عينها منو...بونتو فيها زدت لصقتلو وين هو وين انا...قريب شنقلها املاك خاصة هههه.... وفمة واحد جون محلاه ولد خالو اسمو انور ...ريت الاعجاب في عينيه...و كيف كيف ايمن فهمو...وين ما ندور نلقاه بجنبي.. و يجبد في الحديث باي طريقة...
انا نغزل على سلمى بنت خالتو وهو يغزل من انور ...ولات القعدة بالعصب قلي :_ قوم نروحوا..بهت فيه قتلو :_ زيد شوية .وامو زادة ياخي ولى يصيح:_توة تقوم.امي اكهو خلينا نمشيوا. خالتي بية باهتة فيه وقتلو :_باهي لحظة نعطي كادو كنتي .كدولي الكادوات حتى انور... و خرجنا.
خدم الكرهبة وطار عجاجة وانا موش فاهمة شبيه؟ طفيتو وقعدت نحل في الكادوات وعاملة جو...انا وصلت لكادو انور وهو خذاه من ايديو بدا يعيط: عجبك كادو سي الشباب؟هو يترومز وانت تقلي نزيدو شوية؟انا ما تسمعنيش ما تقربنيش و غيري تخليه يتقربلك؟؟؟تصدمت والله ...
و هزو منا ومنا و رماه مالشباك... وكنت نعقل:_شنوة ريتني عملت ياخي؟بالك لصقتلو ولا عنقتو؟ تي هاك انت اللي هزيتني...و زيد الراجل ما ريت منو شي هذاك مخك الخامج اش صورلك...شد فران حتى لين راسي عدو صرب في البلار...و تلفتلي:_انا اللي مخي خامج ولا انت اللي شاريتلي منوم ترقد في؟،...بلعت لساني و ما لقيت ما نقول...معناها فاق بي...يا ناري... وزاد كمل على مرمتي:_الليلة يا تكون مرتي بالفم و الملا يا ...و سكت هديت روحي و سكت .... وصلنا طلعت قبلو للشمبر نجري... خلط وراي ... حسيت روحي بش نطرشق...عييت و استنفذت اللي عندي الكل.. وهو كمل على ما بي... هو دخل و انا قعدت عالكنابي نرجع في النفس و دموعي معاه...جا قعد بجنبي و قلي:_ مي نحبك تفهمني... كل شي بيناتنا يمشي عكس ما نحب...راني نحبك ...راني خذيتك على خاطر نحبك...درت وعرفت و ريت...اما ملالي عيني غيرك..ما لقيتش كيفاش نوصلك...انت كل باب انا نحلو انت تسكرو...ريت نصبر عليك العمر كلو المفيد تحبني...و كل شي يجي برضاك... حتى كقتلك اكا راني موش نهدد فيك راهو من غيرتي عليك...وانا دموعي اللي شادتها تسيبت... عنقني وانا نبكي عندو ....وهو يسكت في...._« يزي يا بنتي » قتلو:_انا زادة نحبك و نموت عليك اما الله غالب انت لزيتني بش نعمل اكاكا معاك...هو:_اسكت باهي يزي ... وبدا يبوس في ...و النار قدحت....ما بت كان مدام ايمن بن....و توتة توتة فرغت الحدوتة