كرونيك ❤ الحب المشحون ❤ الجزء الاول

 العنوان #الحب_المشحون  💙
#ep1
اللي فات الكل حاجة ما تتحكاش خاطر حتى شي فيها ماهو سبسيال. تبدا حكايتي من نهار اللي تغيرت فيه حياتي و تقلبت ... نبدا حكايتي حفيت على خدمة و النافع ربي ما عندي حد زوالية انا وامي اللي شقات علي حتى قالت يزي و بابا ما نعرفوش هج و خلانا للهم و الشقا. قريت تعبت كملت و توة وقت الخدمة يزي ما ميمتي تعبت . نهير بعثولي بش نمشي نعمل انتروتيان في شركة كبيرة ،قمت عالصباح حضرت روحي و توكلت على ربي مع دعيوة خير من امي .انا مي عمري 23سنة ديامنتة هكا كنت نشوف في روحي اما ديامنتة مغبرة يجي النهار اللي تمسح الغبرة اللي فوقها و تلمع لمعة تخطف الابصار .كنت مضروبة في روحي ايه الفقر و العنطزة .. الله غالب شعر بني فاتح يموج وراي ديما في ضفرة طويلة عينين شهل تغطيهم اهداب طويلة خشم صغير لكن شامخ ما يذلش فم صغير وجه مدور و سمرا مسرارة عسل .وصلت للشركة دخلت نلقى صف تبارك الله ايا قلت هذي البداية و العمال على ربي خذيت كرسي و قعدت كل مرة يدخل حد و يخرج يا مكشبر يا يتبسم .قلقت قلت ايا برا نمشي نعمل طلة على روحي في المراية سالت على تواليت ومشيت ريقلت جوي انا وقتها لابسة روبة طويلة عليها فاست قصيرة تالون نوار و شعري يتمايل وراي مغرور كيف مولاتو .وانا راجعة انتبهت لباب بلار ما يوريش وقفت نتملى من جمالي هزيت حواجبي و رميت بوسة لروحي ورجعت و ما كنتش نتصور اللي هذاكا بيرو المدير و اللي سيادتو كان يتفرج في وانا نتمعشق في روحي .
ايا يا سيدي رجعت قعدت و نشوف في راجل كبير خرج يثبت فينا حسيتو ركز علي ومن بعد ناداني باشارة من يدو سالني على اسمي و قلي ارجع بلاصتك تو ناديلك. رجعت و قلت شنية لحكاية شبيه ناداني انا من دون الحاضرين .. انا غاطسة في افكاري موجة تهز وموجة تجيب و نسمع في اسمي مشيت للبيرو اللي دخلولوا الجماعة الكل نلقى 3 رجال كبار و مرا متوسطة و راجل قاعد بعيد عليهم و بدا الانتروتيان
سالوني شوية اسئلة على قرايتي و اختصاصي و على الخبرة قلتلهم منعدمة كيف تخدموني تو تحضر الخبرة ضحكوا من بلادتي الله غالب عندي لسان سليط قالولي تو نكلموك ياخي الراجل القاعد من بعيد قلهم قبلتها غدوة تباشر واصلوا في بقية التفاصيل معاها
وقتها انا انتبهتلو خاطر مخي كان مع اللي قدامي اما كي تلفتلو وقتها دار وعطاني بالظهر راجل طويل مكستم شعر اكحل ليل كتاف عريضة هذا ما ريت منو قلت ايا الجايات اكثر مالرايحات (عندي شوي بلادة مصري هههه) صححت الكنترا شهر ستاج ومن بعد يبدا الرسمي شهرية باهية كمبتدئة روحت طايرة حمامة بالفرحة لامي زهرة نبوس ونعنق و هي :يزي برك فكني تو كنذوق فلوسك بوس قد ما تحب... انا:يا احلى ماما تو تشوف العز على ايدين بنتك وراسك يا غالية ما نسيك في تعب سنين امي:عيشلي بنتي اما راك تخدم لروحك بنيتي هذاك سلاحك بش ما تذلش و ما تقعدش تحت رحمة حد انا مش دايمة ليك قصيت عليها:امي بربي ما تقول هالكلام كتمشي انت شكون بي قعدتلي انت جناحاتي ربي يخليك لي.ايا هات كويس تاي
و امشيلي شوية فلوس امي نشري بيها لبسة جديدة عيشش زهرتي قتلي ماك تعرف وين برا هز وامشي مع سنية موش وحدك جاوبتها :باهي امي حتى كبرت ديما خايفة علي . وهزيت الفليسات ( امي باعت بايها في دار بوها لخوها و وخذات فرنكين قتلي هوكم مخبيين و تعرف وين على موت على حياة)وطرت لصاحبتي الوحيدة ورفيقة دربي سنسون خرجتها ساقيها اعلى من راسها و عدينا عشوية هبال شريت حويجات على قدي و تعشينا بضحك و لعب روحنا المغرب
روحت لبيتي و فرشي و مخدتي كنت نسميها وسادة خالية خاطر لحقيقة بعمري ما حبيت بالرغم اللي برشا حاولوا يتقربولي كنت نشك ساعات قلبي مركب بالغالط و ما كنتش نتصور اللي بش نحب و يدق قلبي دقة عنيفة تخلعو من بلاصتو. وزيد كنت مضروبة في روحي ماني قلتلكم عاد كنت حاطة في قلبي نقرا و نوصل وتو بعد نتشرط زين و عين ومستوى ثقافي على شكون نرضى و امي ديما تدكك علي تقلي بنيتي توة الذكر شممو و خبيه ههههه تعيا وانت تقبض ما دبرتش رويجل وانت تقرا بش تقعدلي هنا سادة علي النفس ههههه و انا نغزل :نقلها تدكك زهيرة تحبني نخليك وحدك ولا زعمة تحب تتفرهد انت كترميني لراجل ياخي تقلي زايد والله ما تحشم كمل الساعة قرايتك وخوذ شهادتك و بعد فمة كلام.ايا ما نطولش عليكم الهدرة حملت مخدتي و رقدت نحلم بالخدمة .قمت عالصباح قلبي بالدقداقة اول نهار خدمة درا
اول نهار خدمة درا كيفاش بش يتعدا توكلت على ربي لبست حويجاتي الجدد فاست طويلة شوية روز على روب فلوري طويلة و طالون باج و صاك باج سيبت شعري خليتو حر شوية كحل و روز في فمي و مشيت اول مرة قلت خليني ندلل روحي بتاكسي .وصلت في الوقت سالت وين بش نخدم نعتتني اللي في بيرو الاستقبال .مشيت وفي ثنيتي تعديت علىى اك الباب عملت طلة على روحي درت على اجنابي و عملت غمزة وواصلت في ثنيتي. نلقاه بيرو مضخم كبير بحذاه3بيروات صغار الكبير فيه راجل كبير سي محمد اللي بش يشرف على ستاج ومعاي زوز ستاجيارات اخرين منى و سامي اللي تعرفت عليهم نهارتها
ايا بدينا الخدمة جابلنا دوسيات و بدا يوري فينا كل واحد بشنوة بش يتلهى . نسيت بش نقلكم انا عملت كونتابليتي و كل ما هو امور مالية بش تولي عندي في الشركة لذا دربني سي محمد بش يخلي بلاصتو و يخرج تقاعد .ووقتها فسرلنا انو المدير يحب على شباب للشركة يتكونوا و يواصلوا معاها .منى سكرتاريا و سامي ماركتينغ .الحاصل تعدا نهارتها محلاه بين ربثة و خوف و فرحة . حتى وقت الراحة ساعة عدينها في بيرواتنا نحكيو مع بعضنا و ناكلو وما كانش في بالنا اللي فمة كاميرا قاعدة تراقب فينا و تنقل في جونا للمدير.
الحاصل ما جات الستة متاع العشية كان احنا سايي الدوسيات كلاتنا اما حد فينا ما تجرا يتكلم .روحت تاعبة و التالون دقدقلي كرايمي رميتو مالباب بست زهيرة تعشيت معاها و عادي بروحي نحكي معاها ياخي هزني النوم . من غدوة كنت في الوقت في بيروي مع الجماعة ياخي تفاجات بسي محمد يقلي:مي امشي لبيرو المدير يناديلك. سالتو علاه اش فمة قلي ما نعرفش ملي جاء كلموني قالولي دوب ما توصل تمشيلو. قلت ملا غلبة باز بش يقلي روح ما فماش خدمة .. وبعد قلت علاه اش عندو رى مني لا لا ما نتصورش تي صححت كونترا و بعد قلت ايا مولاها ربي حتى كان يمشي يزمر هو وخدمتو اللي خلقو خلق غيرو . كنت نمشي و نتكرم وحدي و بزهري لخرف نهراتها ظهرلي نلبس سروال دجين مقطع لموضة و سورية دخلت شطرها من قدام و الشطر خليتو و كونفارس نرتح بيه سويقاتي من تعب البارح و شعري شديتو كو دو شوفال قلت ما لقى كيفاش يراني كان هكا؟ايا وصلت لاك الباب وقفت جاني كينو مضبب ياخي ظهرلي هكا نفخت عليه و حطيت فمي قوقي وطبعت بوسة فرغت فيها ستراس ضحكت حسيت روحي تفرهدت شوية و تعديت ددرت مالشيرة لاخرى و دقيت بابا البيرو وقلبي تك تك بش يخرج من بقعتو وفي مخي
ايا وصلت لاك الباب وقفت جاني كينو مضبب ياخي ظهرلي هكا نفخت عليه و حطيت فمي قوقي وطبعت بوسة فرغت فيها ستراس ضحكت حسيت روحي تفرهدت شوية و تعديت ددرت مالشيرة لاخرى و دقيت بابا البيرو وقلبي تك تك بش يخرج من بقعتو وفي مخي الف سؤال
سمعت صوت من داخل خشي رجولي قلي اتفضل ،دخلت ساق لقدام و ساق لتالي الكرسي كان داير للحيط معناها سيادتو كان يحكي و عاطيني بالظهر . ارتحت اما حسيتها حقرة اما تفكرت توصيات سي محمد قلي اتكلم بهدوء و رزانة و ما تتنرزفش من كلامو ولا تصرفاتو راهو صعيب و ما عندو الهوا وين يدور و هذاك علاه كان رجل اعمال ناجح ووالله حتى اسمو ما نعرفو انا وقتها ما سالتش لاني مانيش في علاقة مباشرة معاه . ايا صليت عالنبي قلت خير ما يرانيش هكا . هديت روحي و صبحت عليه لحقيقة جاوبني بادب :صباح الخير اتفضل ارتاح . قعدت و راسي ما هزيتوش برغم اللي ماهوش يغزرلي قلي:انسة مي ناديتلك بش نقلك اللي ستاجك بش ينقص جمعتين و نحب في الجمعتين هذومة تشرب الخدمة لذا اكبس روحك و اتكبس زادة و الحكايات الفارغة نحيها اتفضل توة لبيروك. ما نعرفش علاش بلعت لساني و خرجت لا كلام لا سلام المفروض راني مسحت بيه القاعة و خليتلو خدمتو . خرجت نتبهلل مش فاهمة شي تعديت على اك الباب خرجتلو لساني و سبيت بو الخدمة فرغت غشي فيه و رجعت للبيرو .ماحكيت حتى كلمة منى تسال في كيفاه الندير و شبيه و سامي يستنى في اجابتي وانا نحس في مخي بش يطرشق شبيك يحكي هكا السخطة هذا ؟ظاهرلي مانيش بش نتفاهم معاه و هذي البداية وما زال مازال .قلتلهم تو في الراحة نحكيو.و كملنا الصبحية وانا على اعصابي.
تنفسنا كيف خرج سي محمد و حكيت للجماعة قلتلهم وحدة سخطة لكزة مضروب في روحو ما ورانيش حتى وجهو يكلم في و يتسومم ما نعرفش علاه قلي اكاكا ياخي منى قتلي مي يا بنتي كبش في الخدمة بيديك و سنيك تي ما صدقنا لقيناها و اسكت على روحك امي تقول اللي تخدمو طيعو .و سامي قلي ارمي وراك هيا نخرجو نفطرو لبرا نبدلو جو و نرجعو .خرجنا بردت في اك الساعة و رجعنا غطسنا حتى للستة متاع العشية روحت ديراكت لسنسون صاحبتي فرغت قلبي قتلي هذيكا الخدمة و هذوكم العروفات اخدم و اسكت على روحك و خمم في امك وراك .روحت لزهيرة بوسة و تعنيقة سهرنا شوية و عنقت مخدتي و رقدت .الصباح كالعادة في البيرو صبحت على الجماعة و نلقى كدس دوسيات على بيرويا قلي سيمحمد هذاك بايك اليوم قلك ال
قلي سيمحمد هذاك بايك اليوم قلك العرف ما تخرج الا ما تكملهم !!! بهت و منى و سامي استغربوا ياخي جاوبتو قتلو هاو بش ترصيلي بايتة هنا ظاهرلي هز كتافو مع تبسيمة خفيفة و سكت.
غطست في اك الدوسيات لا خرجت ولا فطرت و نسب في جد بوه من اعماق قلبي .تقولش عليه شاد علي البونتو ..الله يصبرني على خاطرك يا زهيرة هاني نبلع و نغص و مولاها ربي .ما قلتلكمش زهيرة اختصاص حلويات خدمتها تصنع و تبيع و تكقر الخدمة في الاعياد و المناسبات و انا تعلمت الصنعة منها .كنت ندكك عليها نقلها بنيتك سبع صنايع و البخت ضايع ياخي تقلي الصبر باهي بنيتي ما تعرفش على المكتوب اش مخبيلك. وهو مخبيلي برشا حاجات ...
نوقز التليفون في البيرو ما فمة حد الكلهم خرجوا كان انا هزيت التليفون ياخي جاني صوت خشين رجولي قلي و هو يتمقعر : هوكا اللكزة و السخطة اش ينجم يعمل و استنى ما زال مازال اتمتع.و علق. تصدمت ياخي كيفاه عرف و منين سمعني اش حكيت البارح؟رميت الستيلو قمت ندور في البيرو كالمهبولة ثبت ثبت ما لقيت شي .. قعدت و ساقي ترعش ملا مصيبة هذا هاو يسمع في كل شي ..يا ناري على روحي ظاهرلي بش يعيفني في روحي اش بش نعمل؟
استنيت الجماعة حتى يرجعوا قلت ما فيهاش نسيب الخدمة و فك علي .جا سي محمد قتلو نحب نقص على الخدمة و يزي فيه البركة بهت و قلي علاه شبيك؟ هذي فرصة ما تجيش كل يوم .قتلو هكا ظهرلي قلي استنى نطلب العرف و نقلك .قعدت على نار ياخي بعد ما كمل تليفونو قلي ايج نمشيولو . قعدت نتبع فيه ساق لقدام و ساق لتالي دق البابا و دخلنا سلم عليه ياخي دور كرسيه ووقف.... يا لهويييي اش بش نوصف و اش بش نحكي رجولة ناطقة شوشتلي افكاري ... عيني كبار زرق في زرقة لبحر ريت روحي فيهم و تمنيت نغرق فيهم و ما نخرجش خشم طويل فم مزموم متاع واحد ديما ماخو موقف ريحة البرفان تعطرق ...نحس في مخي وقف و الوقت وقف وانا ضايعة فقت كان بسي محمد خارج قعدت نتبع فيه بعيني و نخزر لمراية مقابلتني نشوف في سي محمد من برا واقف يستوي في كوستيمو و يمسح في خشمو..اه شومي هاي توري هذاك الباب اللي كنت ناقف نغزر فيه لروحي غزرتلو قتلو ياخي... قلي :ايه ريت البوسة اللي عالطاير و الغمزة و لسانك اللي على برا و تسب.... لعبت علي الدوخة
حسيت روحي تلميذة تشدت بعملتها تبهذلت و قلت هذا سايي اليوم بش يقلي برا روح .وجهي مشى الوان و جا الوان حمرا و زرقا مالغصرة ههههههه هالعملة الكل
.وجهي مشى الوان و جا الوان حمرا و زرقا مالغصرة ههههههه هالعملة الكلبة اللي عملتها في روحي ...انا خايضة هكاكا و هو قلي: مالا تحب تبطل ؟ و غزرلي هاز حاجبو يتمقصص علي .لميت طرف الشجاعة اللي عندي و قتلو ايه ياخي قلي ما قريتش كونتراتوك؟ افضل زيد عاود اقرا هذا. خذيت الكنترا و نقرا في سطر ملونو هو الانقطاع عن العمل لاي سبب قبل انتهاء مدة العقد بسنة يكلف صاحبه بشرط جزاءي دفع غرامة مالية تقدر...كي وصلت غادي شهقت و عيني تحلوا ملاين زرقا يا بوقلب ... و هو تكلم من غادي وقلي : اتفضل شد بيروك و الدلال خليه في داركم و خدمتك تكون العشية على بيروي . تصدمت و ما لقيت ما نقول حسيت كره العالم الكل كرهتهولو الله لا تربحو جيت خارجة و هو قالي: و زيد اللبسة يلزمها تكون محترمة اك السراول المقطعة و اندرا شنوة ما نحبش نراها في شركتي . ما نعرفش كيفاش نطقت: انا محترمة حبيت ولا كرهت و طربقت الباب و خرجت من غير ما نشوف ردة فعلو.
الخدمة وترتلي اعصابي و اكثر منو هالانتروتيان اليوم .انا غاطس فس بيروي و مشاريعي و هزيت راسي نغزر لبنية الشعر طويل يموج وراها و روبة طويلة هي محليتها تتمايل تتمعشق في روحها في المراية هي تسخايلها باب اما انا نشوف الواقف من داخل و اللي من برا لا..ههه رمات بوسة لروحها و مشات نحس في الدم يخض في عروقي عرقت و سخنت وفديت مع بعضهم رميت اوراقي وقمت شنية هالمهبولة اللي ترمي في البوس و شدني الضحك من غير ما نشعر .جلبت انتباهي،و شدت اعصابي في نفس الوقت ناديت لمحمد قتلو فمة وحدة لبرا شعرها طويل مسيب و لابسة روبة طويلة اسالها على اسمها و دخلها للانتروتيان و مشيت انا لبيرو الانتداب وقعدت فرايجي نحب نشوف المهبولة اش بش تحكي و كيفاه بش تتصرف و بعدها نقرر و فمة حاجة من داخل تقلي اقبلها.
دخلت ريحتها هاديو بنيييينة تدفي قعدت هادية تستوي في شعرها النافر تحدثت بهدوء(تفكر نهار الي شافها اول مرة )
ما نخبش عليكم عاجبتني و حالية في عيني و زيد لسانها الطويل اللي ليه قصة زاد شدني وقتلي بدات تتمقصص على الخبرة نطقت قلتلهم من غير ماةنشعر قبلتها و خرجت . شبيني هكا ماةنعرفش حاجتي بيها هوني نحب نشوفها قدامي تخدم عندي تحت رحمتي
و رجعت لبيروي مخي داخل بعضو شنوة فيها اللي شدني ؟ انا أيمن بن...تشدني طفلة بهلولة ؟؟لا عاد ... ما حكيتلكمش انا وحيد امي و بابا اللي توفى وورثت عليه قروب بن ... امي ماللي توفى بابا تعيش في فرنسا بحذا عايلتها وانا نطل ولا هي تجيني .تربيت كل شي يجيني ليدي مهما يغلى ولا يرخص شي ماهو صعيب علي بالرضا ولا بالغصب ناخو اللي حاجتي بيه عايش حياتي ما نامنش بالحب ولا بالعرس نحسها صفقة خاسر ما فماش مرا وحدة ترضي غروري و تاقف عليها حياتي....هههه لغة مضروبة العجلة تدور وحياتي ما تاقف على حد ما هدا امي و ما فماش مرا تطول بش نجيبها.. الله غالب مغرور متكبر نرجسي حتى ابعد الحدود
انا ديما نوصل قبل الموظفين متاعي و اليوم حاجة جديدة نحب نشوف البهلولة في اول نهار خدمة ليها.وصلت خدمت الكام و قعدت نستنى و بكلي تركيز على الشاشة قدامي نستنى في للة الحسن تجي. دخلت تموج في روبتها قلبي دق دقات متنافرة قعدت بعد ما تعرفت على اصحابها . تلهيت شوية و بعد نرى فيها واقفة على الباب اللي هو مرايتي و غمزت ومشات... شمية هالطفلة هذي؟ توزع في البوس و الغمزات..فلتة هالطفلة تبسمت بالرغم اللي حسيت الدم يحض في عروقي وما نعرش علاش قلتلهم تجيني توة توة .... درت للحيط حبيت نقرصها بش تبطل تبهليلها لاني يا اما بهلولة بالرسمي ولا وحدة من اك الجماعة ... هنتلتها من غير ما تراني و كنت متاكد انها بش تعديها و تسكت .وفعلا هي خرجت منا و انا درت نغزرلها كي مدت لسانها و سبت و مشات قدام لمراية....
نحس في اعصابي الكل مستنفرة انا أيمن تخرجلي لسانها وتسب ؟؟الا ما نمرمدها و ندمها حتى تاكل صوابعها .ما تعرفش مع شكون تلعب .
يلزمني نمزبلها بش نبرد و نعيفها في حاجة اسمها خدمة معاي .ناديت للمحامي و قتلو يزيد في كنتراتوها الشرط الجزائي بش ما عندها وين تهرب مني و بعد يبدا اللعب على اصولو
و روحت وانا نغلي يا انا يا هي

رجعت لبيروها و الجماعة يسالو فيها نسمع كي قالتلهم في الراحة تو نحكي بطلت مانيش خارج و قعدت مسمر نستنى فيها شنوة بش تحكي .و بدات عاد لكزة و سخطة و ضاربو في روحو طلعتلي الكلبة بنت الكلب
انا اللي اسمي يهز جبال و يرعش رجال تحكي هي علي هكا؟و شكوني هي ؟ناديت للمحامي جابلي سيفي متاعها و كنتراتوها قتلو يتصرف و يزيد بند الشرط الجزائي بش ما عندها وين تهرب مني و فليت اوراقها عرفت عليها كل شي حتى نومروها سجلت عندي و روحت قبل وقتي نغلي ... والله الا ما نربيها هي جامحة وانا اللي بش نروضها الا ما نعيفها في روحها و ندمها حتى تاكل صوابعها .ما نبرد الا ما نكسر شوكتها و نبرد فيها قلبي وقتها نسيبها .تعديت سهرت غفصت وحدة على قد غلي و روحت و انا نتحلف يا انا يا هي
من غدوة في بيروي نتفرج فيها جاية تتبختر سروال مقطع زاد نرفزني شعر ملموم مهرة جامحة اما راسي براسها . كلمت محمد قتلو وصلها جمعتين تشرب الخدمة و حطلها ستوك دوسيات اللي يعطلها و قلها اليوم يكمل . ما طولتش و جاتني تحب توقف الخدمة و هذاك اش حاجتي نحب نذلها نحسسها اللي انا نحرك فيها وقت نرضى تو نسيبها...ههههه شرير الله غالب هي اللي بدات حتى ولو ما تقصدش
هههههه نحس في اللعب احراش
وريتها الكنترا وقعدت نثبت في قسماتها عينيها وساعوا ودخلت بعضها و التمرد اللي كان مالي عينيها ولى انكسار .و بالرغم اللي هذا اش حاجتي لكن سخفتني .اما تماديت زدت هنتلتها و لسانها نطق اك اللسان اللي يلزمو يتقص قريب تقلي محترمة اكثر منك و كان عجبك و طربقت الباب ...هذي حتى وانا لاويلها يدها باقي تتكلم و تتعنطز !!!لا عمري ما تعرضت لهالنوعية هذي فديت بش نطرشق من جنابي .باهي يا بنت زهرة وراك وراك
غطست في الخدمة و ساعة ساعة نطل عالكام نلقاها راسها ما هزتوش و زيد ما خرجتش للفطور .خليها تتربى على طولة لسانها .
طلبتها حبيت نزيد نستفزها قلتلها هوكا السخطة و اللكزة اش يعمل و علقت
مي: رجعت نخدم ومخي يغلي ياخي رجعوا الجماعة قعدوا يهديوا في و انا نطلع في صوتي بلعاني نورمال نخدم اما راسي ما نوطيشو مالها الا توفى المدة و نخليها واسعة وعريضة لاماليها...و كملت خدمتي والمفيد المساج وصل. روحوا الجماعة و انا قعدت نكمل سويعة اخرى اكاكا و نخرج طلبت زهيرة طمنتها وقلتلها تو نروح في تاكسي .نسيت اللي انا بشري مالصباح ما كملت كان ما لعبت علي الدوخة .قمت نترنح و نسب في الجدرة لولى متاعو و نلقاه قدامي ... بلعت لساني فتو شوية بش نخرج ياخي سد الباب بيدو و قلي: مالا قتلي تخليها واسعة و عريضة؟؟ يسخايلني بش نسكتلو اما انا نطقت :تسخايل الدنيا على قرنك نخدملك خدمتك اما هذا و خرجتلو لساني ما يسكتلكش يا شسمك ؟؟جاوبني يضحك: ههههه اسمي ايمن و تو نشوفو . انا حرحت عميا بالغزول و هو خرج شايخ عامل جو وقفت تاكسي و نغزرلو واقف بكرهبتو غول اسود كيفو و روحت ساقي اعلى من راسي
ما حبيتش نحكي لامي بش ما نحيرهاش اما طلبت سنسون فرغتلها قلبي و نحكي و نسب حتى بردت . بت ليلتي و نتخيل في شنوة يستنى في من غدوة .لبست فاست و سروال بوزي نوار لميت شعري لفوق كعكة و مشيت وجهي مغسول بالما و الصابون نحبو يبعدني و انا نتجنب اي احتكاك بيه هكا مقررة و اللي بش يعطيوني نخدم و فمي مسكر . صبحت على الجماعة و قعدت كالعادة نلقى جبل دوسيات منى و سامي مسخفهم حالي خاصة سامي كل مرة يقلي هات نعاونك و انا نقلو لا خلي عليك . جا وقت الفطور و التليفون ضرب سي محمد ناداني قلي ايج جاوب هزيت من غير لا عالسلامة لا وينك لا شي قلي اسمع ما فماش خروج تكمل خدمتك و بعد تخرج و علق
.حاولوني بش نخرج معاهم سامي و منى قلتلهم لا و هوما فهموا اللي موش مني .قلي سامي تو نجيبلك حاجة تاكلها . غطست في الدوسيات كالعادة ،شميت ريحة البرفان متاعو سبقتو . جاي يتمقصص علي وقف و ربع ايديه متكي على الباب و قلي بشطر تبسيمة متاع تمسخير :تحب شكون يعاونك هزيت حواجبي نقحرلو و طفيتو مانيش بش نكلمو كيعمل الحكمة .سكت وقلي:هوكا طبق فطورك وجا خارج ياخي قمت بغل هزيت الطبق و رميتو في الزبلة وقتلو كينبدا بش نموت بالشر والله لا ناخو معندك كتبدا روحي معلقة فها
خرجت من بيروها مخي واقف شنية هالقوة الكل و حتى وهي تحت رحمتي باقي تباقق في ؟!!! قررت نقوي في دوزاج التهنتيل و نشوفو وين بش ترصي . رجعت نتفرج فيها محلاها منرفزة خدودها حمر تعض ىفي شفتها مالغزول هههههه مابنها عسلة اما نار تشعل بصراحة .. شوية اخرى وجاوا زملاءها نغزرلها زميلها جابلها سندويتش خشاتو من عندو وتذبل في عويناتها ....غزلت يعني زميلها الستاجيار عاجبها و تقبل منو و انا العرف و نحكم باحكامي تطول في لسانها علي و زيد ما تقبلش مني... باهي يا مي وراك وراك و الزمن طويل
امي كلمتني مريضة و قررت نسافر نطل عليها وخليت لامور معلقة هدنة حتى نرجعلها اما وصيتهم بش يتعبوها في الخدمة . غادي حسيت روحي حاجة ناقصتني، توحشت تزعبينها خيالها غمزتها بوستها ههههه نتفكرها نضحك اما كنتفكر لسانها نتكبس و اعصابي تتوتر . هي ارتحت عديت بقية الجمعة رايضة هو موش هنا تنفست ولو اني كل يوم نلقى كدس خدمة اما ما على باليش المفيد هو يبعدني . اما في نفس الوقت نتفكر غزرتو شكر تبسيمتو حتى نبزاتو نضحك و نغلي في نفس الوقت. اما ليامات تعدات ماسطة ما فيهاش كر و فر كنت نمشي ديما محضرة روحي لعركة اما توة نمشي وفاشلة ما فماش حاجة خاصة تستنفر طاقاتي .جا الويكند عنا عرس بحذانا العروسة بنت الجيران .حطيت الحطة و مشيت مع امي و سنسون و امها .بدا الربوخ و انا عضامي ترقل قلت ما فيهاش شطحة نبرد فيها دمي و نحي الستراس انا جيت نقوم و زهيرة قرصتني قتلي اقعد فمة ياخي من عقاب ريحتنا تشطحلهم ؟تنطرت قتلها بش نشطح لروحي و نضحك و دخلت في وسط الحلبة فرغت هم قلبي و فتقت مواهبي .. وانا في قمة العطاء متاعي و امي تتحلف في من غادي تليفوني نوقز هزيت و مانيش نسمع في صوت من قوة الحس في السهرة خليتو محلول و النبي مولاك . ما على باليش بيه قامت زهيرة كركرتني و قتلي اترص
و قتلي اترص والله ما تحشم بركتني زدنا شوية و روحنا .
قمت بكري دوشت و حضرت روحي و مشيت لخدمتي انا داخلة و سي محمد قلي برا لبيرو عرفك . علاه قتلو اش من مصيبة زادة ؟هز اكتافو معناها ما نعرش .حطيت صاكي و مشيتلو دقيت ودخلت ما صبحتش ما عينيش .كان واقف داير تلفتلي تلفيتة دق قلبي معاها ... تبسم قلي:بايت معاك ما تصبحش؟ قتلو ما تستهوينيش ماكش من نوعيتي و زيد ما عينيش نصبح . هو العرق اللي في رقبتو نفر و انا بردت خاطر يرمي في المعنى انا لا متاع مبات و لا بطاطا ... هو فد فدة كلبة و قلها تجيب صاكك توة و اخرج قدامي ! انا نجبد بدم بارد قتلو خدمتي حد البيرو ما في باليش زادة بش نخدم لبرا؟؟ هز حواجبو وجبدني يكركر في ... و انا خفت و قلبي تقبض ...كثرتلها مش هكا مسيتو في رجوليتو.. هههه اما يستاهل جابها لروحو
قلتلها تمشي قدامي ساكتة من غير فضح في الشركة هزيت صاكي كالمرا المليحة و خرجت وحسيت بغزرات الزملاء و الزميلات وحسيت لساناتهم اللي تتكلم في ظهري...اما اش عندي نعمل؟
هو:انا نغلي وشكوني هي حتى اللي نستهويهاش ؟
،و شكون اللي قلها اللي هي تعجبني؟تيهاي ضاربتو في روحها...باهي اصبر تو نوريك الا ما ندمك على كل كلمة قلتهالي ..
وصلنا للباركينغ و انا نتكرم بالغزول وهو يسمع في و مطفي الضو اما حاستو بركان نار يغلي وراي .حل الباب و قلي اطلع قتلو لا ما نركبش معاك و ما استانستش نركب مع اي حد قلي انا عرفك و عندك خدمة موش ماشيين نغرمو في زماننا هزيت حاجبي و قحرتلو و قتلو حتى كان بش نغرم كتقعد كان انت عمري ما نتلفتلك .. حسيت يدو رفت بش يضربني و نطرلي يدي و رماني في الكرهبة و سكرها و طار عجاجة ... هالنهار المبروك باين من اولو ..
وصلنا لفرع مالشركة كبير طلعنا بيروه الفوق دخلني لبيرو لاصق في بيروه صغير و كدسلي خدمة و قلي ما تروح الا ما يكملو و مشى و ضحكة واسعة و عريضة معلقة على فمو ...صليت عالنبي و استهديت بالله بش نبكي والله ما نبكيها من واحد ساقط كيفو ما يفرحش بدموع الذل مني نخدم و كلي قهرة و نحس كان بالرعشة ماكنتني ياخي نوقز التليفون اللي بجنبي عرفتو ما يكون كان هو هزيت و ما تكلمتش قلي يتمسخر ظاهر فيك عظامك ما زالت ترقل من شطيح البارح؟ ووعلق ....الله لاتربحو ياخي يعس علي حتى البرا؟ ومن بعد تفكرت التليفون و النومرو اللي طلبني من برا و ما نعرفوش .. برا لا تربحك و انشالله تبقى ممروج كيما انت مارجني
هو توحشتهاو توحشت ركاكتاهاو لسانها الطويل طلبتها نلقى حس غنا و شطيح و نسمع في صوتها و هي تعيط مع وحدةاخرى ... عرفتها بايتة تشطح في عرس غزلت ما نعرش علاش اش يهمني فيها تشطح ولا دبر راسها... ياخي مسؤولةمني.. تشطح و الرجال تتفرج فيها زايد اش نستنى من وحدة ترمي في البوس و الغمزان في كل بلاصة... لا اش يهمني انا غدوة نوريها و شطيحها تخلصو ثاني و مثلث و خذيت الطيارة عالصباح و كنت في بيروي نستنى فيها تشرف محضرلها برنامج هايل
غاضتني و هي غاطسة تخدم و ترعش ريتها واضحة مالكام مانيش حاسس روحي مستمتع بتعذيبها علاه؟هي مسحت بي القاعة و حسستني موش راجل انا اللي الف مرا تتمناني بنفوذي و سلطتي و فلوسي وزيني ... فديت نحب نسيطر عليها نحبها ترخ و تسلم هذاك الشي الوحيد اللي يرضي غروري .. و قررت اني بش نواصل و المرة هذي باقوى من هكا خلي تركح شوية و مبعد فمة كلام
جابوا طبق الماكلة خليتو كيما هو في مخي كان نكمل و نروح كلمت زهيرة وقلتلها راني بش نوخر شوية قتلي اخدم على روحك بنيتي ربي يعينك ما صدقت لربي اللي تهنيت عليك بخديمتك .وووه يامي حتى هي خدمة الصبر يا ربي!!!قويني على الي ناوي يعملو في ...اش عمتلو علاه هكا؟قرصتني معدتي اما والله ما نحط سمو في كرشي كينبدا نغفلق زايد و تو نولي نعمل على روحي نجيب ماكلتي مالدار ما دامو ولالي يوميا هكا . جا الليل و الدنيا ظلامت وانا موش مستانسة بالخروج في الليل . كملت قريب التسعة الناس الكلها روحت قمت نترهوج من كثر ما طبست راسي و عيني فلو ساقي تخبلو وما فقتش بروحي كيفاه طحت .. فقت برشة ماء لقيت روحي بين يديه يشرب في و يخرنن الكلو منك ما تاكش نهار كامل دزيت الكاس من يجو تكسر قعد يغزرلي باهت عينيه في عيني وفيهم لمعة خفيفة وانا حسيت روحي تسحرت للحظة من بعد تنطرت من عندو وقتلو كتراني بش نموت ما تقربنيش بيناتنا خدمة اكهو وخرجت ساقي اعلى من راسي .وقفت نستنى في تاكسي و هو خلط وراي بكرهبتو وقف يغزل و يغزرلي حتى ركبت و روحت
روحت تاعبة طمنت على زهيرة تعشيت و تمديت في فرشي على وسادتي الخالية نراجع في نهاري هذا راجل يحاول يهدني باي طريقة ما لازمنيش نستسلم هو باسلحتو وقوتو حتى انا عندي ما نقول في روحي تو نوريك يا ايمن يا ولد امك ...اصبر على رزقك .. اما هو بيناتنا محلاه رجولة طاغية ريحة موش عادية في كي قربلي شعرو هبط على وجهو تمنيت نمد يد نرجعو لتالي عينيه بحر مانيش عارفة وين بش نوصل فيهم يا لندرا نوصل للشط ولا بش نغرق اكثر...حسيت بحنانو وخوفو اما التسلط فيه طاغي عليه حاسة اللي هو يحبني نسلم والله لا نفرحو باك النهار
انا اكاكا و نوقز تليفوني نلقاه نومرو ما نعرفوش دق قلبي حسيت اللي هو وفعلا انا قلت الو وهو من غير مقدمات قلي غدوة ماشيين للحمامات عنا خدمة متاع نهارين غادي حضر روحك تو نهزك من الشركة.وعلق .يا ربي هالبلوة انا وياه في الحمامات ...عمري كلب زايد طول عمري في الهم ...خرجت لزهيرة حطيتها في الصورة قتلي رد بالك على روحك عيش بنتي و كلمني .دخلت حضرت صاك خفيفة فيها تبديلتين اخترت احلى ما عندي نحب نزيد نقهرو ...ولا نعجبو زعمة؟..لا لا حتى كان وين عنا نوصلو هو عرف وانا موظفة عندو اش جابنا لبعضنا وزيد هو موش طايقني كل مرة عاملي عملة... دوشت و حضرت روحي ومن غدوة لبست تانقت روب طويلة نوار عليها جيلي قصيرة روز كلار جبدت شعري و سيبتو مع وردة روز على جنب صباط باطو روز برفان هادية شوية كحل وقلوس و خذيت بزايد فلوس من عند زهيرة على ما ياتي الله با ينحيها علي و مشيت
هو خطرلي لمخي بش نبعد بيها شوية عالخدمة في الشركة قلت بالك تهدا لامور و تتصلح و نوليو اصحاب كلمتها في الليل مني نطمن اللي وصلت لباس و مني نحضرها.والصباح كنت نستنى فيها تجي على نار
جات تتبختر محلا زينها عسل و اللبسة الطويلة و المستورة زايدة فيها الشطر تغريك بش تعرف تفاصيلها اما شي ما ترى منها كان وجهها .زعمة هي من نوع بنت العايلة المتربية و بنت اصل ولا تمثل..ياما وقفوا قدامي هكا اما يمثلوا ما ياخذوش في يدي غلوة...مصر اني نعرفها في المشية هذي على حقيقتها بش نستفزها لابعد الحدود و يا تكون كيما نحب و توقتها نقرر تكون لي ولا ناخو اللي حاجتي بيه و نذلها ونرميها ...
وصلت نلقاه يستنى في قلبي عزق نحسو بش يخرج من بلاصتو سورية بيضا محلولة منها زوز قفالي سروال دجين سبادري لينات على عينيه و البرفان تعطعط من بعيد...يا ربي ميفاش بش نعديه معاه نهارين وانا نكرهو كره العما .. غزرلي معناها اطلع اما طلعت من تالي .قلي ايا صبح هالصباح مانيش شيفور عندك اطلع من قدام ماشيين نخدمو رانا موش نلعبو. طلعت من غير ما يلزلي . و انطلقنا حليت الشباك نحس في روحي مربوثة و مخنوقة شعري يطوح فيه الهوا لميتو وبستيلو لقيتو على التابلو دو بور و تلفت نثبت في الطريق .ما فقت كان بيه نحى الستيلو و رماه مالشباك قلي خليه اكاكا.
هذي البداية ياسر مستفزة مالا من بعد كيفاه لميتو وحطيتو على جنب ما همنيش فيه الشعر شعري و انا حرة فيه قتلو.. غزل و سكت حك موزيكا قوية و كملنا الثنية ساكتين.خذاتني عيني غفيت قمت نلقى راسي على ساقيه ..ووه لميت روحي فيسع وقتلو اش موصلني لغادي قلي يضحك و يتمقصص علي لقيتك راسك ضربة ضربتين يطايح وليت استويتك وانت تقول مخدرة .... و زاد كمل علي قلي نومك ثقيل انت رد بالك المرة الجاية ...و تبسم اك الشطر تبسيمة متاع تمقعير .تلكمت على روحي وقعدت نلم في مشاعري الضايعة نحس في روحي في فراغ نعوم ما نعرفش شبيني نحبو نكرهو فادة منو متعلقة بيه،؟؟؟؟ميات الاسئلة تقلي حدد موقفك منو .وانا ضايعة هكاكا و ما فقت بيك كان يبيبي بيديه اوو فيق اهبط رانا وصلنا
هو محلاها راقدة ملايكة شعرها يحرك فيه الهوا ما ابنها و تصورتها راقدة في الفرش... اكا كي جات في مخي تصويرة فرش راحل اخر غلغلت ...هذي ما تكون كان لي و في فرشي متاعي نضمها و نخبيها في صدري .. و سرحت ...
راسها كل مرة يتطايح وقفت الكرهبة وحطيتلها راسها على ساقي و كملت نسوق محلاها راقدة كالنسمة بعثت في دفا فريب يدغدغ في اطرافي في انفاسي ...كنت مستمتع باللحظة و حبيتها تطوال و ما نوصلش ...اما... تنطرت كالملسوع موش عادية ديما شيطانها حاضر نحس ديما فمة عركة تستنى في معاها انا نبدا و هي تكمل وين بش ترصي الله اعلم..
هي:ملا حشمة انا راقدة عندو سي المتكبر؟ملا عملة لا ويخوف في زادة...يلزمني ديما فايقة ومصحصحتلو يا ربي هالعملة..تلفت نشوف وين وصلنا نلقاه اوتال رووووعة مت بالفرحة انا عمري لامشيت لوتلة ولا خرجت من تونس.قررت اني نتمتع بكل لحظة واش يهمني في المتكبر هاو عمل حاجة تصلح و ربح في اجر اول مرة بش ندخل اوتيل ههههه.دخلنا للصالة الاستقبال عمرنا اوراق و بعد طلعنا بيتو مقبلة بيتي قلي ارتاح نصف النهار نلقاك حاضرة نهبطو نفطرو ومن بعد نمشيو للشركة .خليتو ودخلت نجري لبيتي ترميت على الفرش و من بعد ظهرلي طلعت انقز فوقو نجرب فيه ههههه و الباب تحل تلفت نلقاه يتفرج في هبالي باهت
هز حاجبو وقلي :ياخي شبيك تنقز كالصغار ضحكت وقتلو فرحانة اول مرة نجي لاوتيل ضحك من هبالي و قلي نسيت بش نقلك اللي في الليل عنا عشا عمل بش يبدا في بالك ..احنا اكاكا و تليفوني نوقز هزيت نلقاه سامي يسال علي شبيني ما جيتش اليوم طمنتو وقتلو لباس عندي خدمة لبرا اليوم وغدوة قلي باهي طمني عليك و نستناك ترجع عندي ما نحكي معاك شديت فيه صحيح قتلو قلي توة امان ما تحيرنيش قلي لا كيف تجي تو تعرف
هذا الكل و السيد شاد الباب قحرلي وقلي اش يحب سيادتو رجعلي شيطاني وقتلو حاجة تخصني ماكش وصي علي بش تسالني ...حسيتو تجن من عرق رقبتو اللي رف طربق الباب و ما زاد حتى كلمة رجعت نقز مستمتعة.
هو:نسيت ما قلتلهاش على عشا الخدمة جليت الباب وراها بش نقلها نلقاها تنقز كالصغار كيفرحوا بحاجة يحبوها تبسمت و سرحت فيها مشمرة روبتها و شعرها طاير وراها ولا على بالها .. دخلت ايدي في شعري اووف ملا طفلة فلتة سحرتني ياخي فاقت بي بطلت و الحقيقة زدت تفاجات كيقتلي اول مرة تدخل لاوتيل ...موش قلتلكم فلتة... انا اكاك ما زلت فرحان باللحظة و تليفونها ضرب طلع اك اللعواك الستاجيار اللي معاها مالاول موش طايقو وزيد توة..حبيت نعرف اش حاجتو عندها و هي ما ضواتليش تنرفزت تجنيت طربقت الباب و خرجت
هي دوشت دوش خفيف و لبست كسوة بوزي سروال و فاست نوار و سورية بيضا لميت شعري لفوق و هبطت قبلو للرستو للفطور قلت مني نكتشف البلاصة مني ما نستناهش .حوست في الاوتيلل تمتعت و من بعد مشيت للرستو .فمة واحد قاعد يتبع في معجب هههه قلت ايا باهي حتى انا عندي مديدة على هالحكاية ..انا وقفت بش نسال منين ندخل الرستو و هو جاني وقف ىقدامي تبسم ومد ايديه وقلي انا اسمي امجد ممكن نتعرف؟ انا ما زلت ما تكلمتش و نحس في يد تلفت على اكتافي و وهو يجاوب قلو ما تحبش تتعرف هذيكا مرتي؟؟؟لاخر مشى بعد ما طلب السماح وانا بقيت مبهمة تلفتلو بش نسبو و نسخسخو نلقاه هبط يدو ومشى يضحك قلي حرقتلك الفيلم...
لحقت وراه نتهز و نتنفض و وقفتو و قتلو اسمع يا شسمك شبي همك انت ياخي مالكني انت بش تتصرف و تقول اللي تحب؟تكونش ماخذني وانا ما نعلمش؟شنية الحالة اللي فيك ؟برا عدي على روحك كثرت على ما وصاوك راهو .ما كلمنيش انا في عينيه لمعة متاع خطر باين الغش فيهم شدني من يدي و كركرني لفوق للشمبر و انا نخرنن تي سيب الهم هذا اما زاد كبس على معصمي لين زرقهولي كسرة في يدو ..لقيت روحي داخلة وراه لبيتو و سكر الباب وحصرني على الحيط بين ايديه الزوز و الشر ينطق من عينيه خفت الحق وهو قلي:اسمع ما زال ما تخلقش اللي بش يعيط علي ولا يسمعني لكلام هاني نبه عليك هذي اخر مرة سمعت موش جايبك بش تطيحلي قدري و التمعشيق و الريق الفارغ خليه البرا .وجرب روحك نشوفك واقفة مع حد ولا تتلغمج مع اي كان وشدلي دقنونتي وقلي والله فمك هذا نهدهولك و خرج و وخلاني مبهمة
هو:دقيت عليها باب بيتها ما جاوبتش،حليت ونا ديت ما لقيتهاش خرجت طاير نلوج عليها درت الاوتيل من اطرفو لطرفو هي ريحتها ما فماش دخلت بعضي و مخي هزني لبعيد رجعت للاستقبال بش نسال ياخي نلقى سيادتها واقفة بش تتعرف ما نعرفش علاش عملت اكاكا اما حسيتها تابعتني ملك خاص،موش من حقها لا بش تتعرف ولا بش تتمعشق .ما عجبهاش سيادتها خالطة وراي تشري في الشبوك وكنت نعقل كركرتها وهددتها نحبها ديما تحت سيطرتي ما عندها وين تهرب.
انا نحس في انفس هرب علي تي هاو يهدد في والله يا كل فرصة متاع راجل تجي قدامي لا نفلتها شماتة فيه.تو نوريه اللعب على اصولو .هبطت قلت موش بش يفسدلي هالنهارين موش كل يوم بش نجي لاوتيل انا.دخلت الرستو هزيت ماللي عجبني الكل مالح و حلو وانا فمي محلول طاقة و ريقتي سايلة .شفتو قاعد مقابلني ،يمشي يزمر قعدت و ندلل في روحي كليت مالانواع الكل وحسيت بالتخمة ..هذاك هو هذا شي نشوف فيه في التلفزة خلي نتمتع مغبون وطاح في الدشيشة كملت .جاني قلي ايا للخدمة .مشيت وراه طلعنا في الكرهبة دخلنا لفرع الشركة ودخلنا بيرو كبير وطويل نلقاه اجتماع برؤساء الفروع متاعو الكل .قلي اقعد مقابلتني وكل ما يخص المالية متاع القروب سجلو عندك ما تفلت حتى ملاحظة.قعدت نسجل في كل شي و اطوال الاجتماع و انا تعبت وهو ساعة ساعة يهز عينو يثبت في نقحرلو و نتلفو. و اخيرا وفى ،استنيت حتى اتفض جاني خذا من يدي دوسي الملاحظات و قلي هيا .روحنا ديراكت بيتي رقدت ..وانا في غاية النوم حسيت بيد تمسح على شعري اما قلت باز نحلم .
هو قعدت نتفرج فيها تلم في الماكلة الكل جابت الشر وجات .وقعدت تاكل مالانواع الكل مخلط مالح وحلو وانا فرايجي ملا حالة فيها .استنيتها تكمل و هزيتها للخدمة .كنت حتى وانا غاطس في افارياتي ديما نتفقدها قلبي يرعش عليها .شو محلا قحرتها..ههه روحنا دخلت لبيتي نراجع في روحي عركي معاها و استفزازي ليها و خلق المشاكل معاها باي طريقة وفدتي من اي واحد يدور بيها...معنا انا نحبها ..ايه نحبها من اول مرة ريتها فيها و هي تتمايل و ترمي في بوسة لروحها ...حببيت تبهليلها لسانها اللي ليه ىقصة زينها وعينيها و شعرها ...السحر اللي خارج منها، بساطتها بلادتها...يا ربي قعدت قعدت و طحت على راسي مع وحدة لسانها اطول منها؟؟... حسيت بحاجة لاني نشوفها دخلت لبيتها بالسياسة وقفت بحذا فرشها راقدة في سابع نومة و نومها ثقيل بركت على ساقي بحذاها ودخلت يدي في شعرها نتمتع بيه...لحظات محلاها..خرجت محي وقلبي مسلوبين مني و هي راقدة موش هنا .. صحة ليها بنت امها.وقتها قرار مسيطر علي يلزمني ناخذها نحوزها باي طريقة و تو تحبني من بعد..
هي قمت نتكسل طلبت زهيرة اطمنت عليها .من بعد غسلت حالتي و انا اكاكا و تليفوني ضرب هزيت نلقاه هو حل الباب هوكا بعثتلك حاجة لليلة و علق.حليت لقيت مرا جايبتلي3باكوات حطتهم وخرجت حليت لول نلقاها روبة روج طويلة ومعاها في لاخرين صاك و صباط. غلى الدم في عروقي لفيتهم ومشيتلو نجري حليت الباب من غير ما دقيت ورميتهم في القاعة ونعيط وينك سي الشباب ؟جيت نستعطى فيك؟شكونك انت بش تشريلي؟ما نحب حتى شي من عندك؟، انا نغلي و نبكبك اكاكا وهو طل من بيت البانو لاف نصفو في منشفة وحاط ايديه على اجنابو..بلعت لساني نهز فيه ونحط و لساني تلكون و نار قدحت في من صباع ساقي لاخر شعرة في راسي ....يا ربي انا وفي بيت راجل و الراجل نصو عريان...حطيت يدي على فمي و نجري للباب ياخي سبقنيى ووقف شدو ما نجمتش نمد يدي خاطر باز بش نمسو...و تكلم هو حاسس روحو سيد الموقف ومسيطر: اش تعمل عندي؟هاك جيتني بساقيك؟ما تحبش حاجتي اما تحب مولى الحاجة ظاهرلي فيك هو يقدم وانا نوخر مهمهت قتلو لا اش تقصد ياخي ؟لا نحبك ولا نحب حاجتك ابعدني وكهو..جاوبني قلي موش قبل ما نعمل اللي في مخي...حسيت بالخطر ...وقلبي بالدقداقة قتلو وشنوة اللي في مخك؟ما ننصحكش نلعب معاي ما عندك وين توصل راهو...ضحك وهز يدو لشعرو اما انا هزيت يدي استعداد لعركة ياخي ضحك علي قلي راك ما تنجمنيش و اللي في مخي بش نعملو والايام بيناتنا ..قدمتلو نهدد فيه وما نعرش شجاعتي وقتها منين جات ولى هو يوخر صيعيىفي وجهو ما عندك ما تعمل وكان عندك ريح ذري عشرة ..تكبس و زم فمو وشدني من زنودي وكبس علي حتى حركة ما عادش نجم نتحلحز و هبط علي بفمو في بووسة قوية متاع غل و غش وحب. ......حسيت الدنيا وقفت ودارت بي اول بوسة لي انا هكا تكون بالغدرة و الغصب و من واحد نكرهو ...الساعة ذبت واحساسي بالو قت و الدنيا ضاع كل شي فقد معناه ما عرفتش نتجاوب خاطر ما نعرفش اما لهبت و حمرت وتغصرت و في قمة الغصرة ندزو و نهز يدي و نعطيه كف و نهرب نجري لبيتي و سكرتها بالمفتاح ووقفت على الباب نستجمع في قوتي ..ما عادش فيها لميت حويجاتي و خرجت كلمت الاستقبال طلبولي تاكسي و ومن بعد لواج وتاكسي لدارنا وصلت الدنيا ليل .زهيرة عرضتني مفجوعة تسال شبيك شبيك طرشقت بالبكا و ترميت عند امي و هي تهدي في .
هو حبيت نشريلها حاجات خذيتلها على ذوقي و بعثتهملهاواما نتوقع في فرحتها بيهم و نستنى نشوفها لابسسة الروج.و نفيق بيها كان عجاجة تعيط و ترمي فيهم كي شافتني ريت اللمعة متاع الانبهار و الرغبة اما لسانها ديما سابقها كل شي تاولو بالغالط نجي نقرب تفسدها و تزيد تبعدما نعرش كيفاش بستها ..كنت شاهيها من مدة طويلة مااللي ريتها اما حطيت فيها غشي منها و محبتي ليها هزت يدها وضربتني...بقيت مسمر في بقعتي نعدي في يدي على خدي و نعاوداعصابي تحرقت انا تضربني مرا ؟؟؟وهي بالذات تضربني....كان جا حد اخر راني دقدقتو ...هديت روحي وقلت خليها تهدا الساعة و بعد تو نفسرلها و نعرض عليها تعرس بي ...خليت مديدة و مشيت لبيتها ما لقيتهاش و ما لقيتش دبشها...لا زعمة تكون روحت ؟وتو في الوقت هذا .كامت الرسابسيون قالولي روحت وسلمت مفاتح بيتها ...ما عادش غي كلفت شكون بش يجي يحضر الاجتماع في بلاصتي و روحت طاير.مشيت لدارهم العنوان عندي .وقفت الكرهبة حومة شعبية عادية .دقيت الباب و نحس في اولاد و نسا الحومة يغزرولي بالرغم اللي ليل.حلتلي مرا كبيرة قتلي عالسلامة ولدي بشكون حاجتك؟ قلتلها انت ام مي؟انا عرفها في الخدمة.قتلي اي وليدي مرحبا بيك لباس اش عملت هاي ماللي روحت وهي في حال؟اتفضل الساعة وليدي الدار دارك .دخلت نلقى مي في الصالة عينيها منفوخة بالبكا .بهتت كيف راتني تكلمت زهيرة قتلي اقعد وليدي مي برا جيب حاجة لضيفنا.انا تكلمت قلتلها لا ما تعبش روحك عندي كلمتين نحب نقولهم لمي قدامك و باذنك بالطبيعة.انا جيتك طالب راغب في بنتك مي .انا جيت مالباب و هي ما تعلمش و ما نحبش تجاوبني توة .ضحكت زهيرة وقتلي النهار السعيد وليدي وتلفتت لمي قالتلها هذي حاجة تبكي .ومي بكشت نغزرلها حالة عينيها اللي وساعت مالصدمة و ما قالت حتى كلمة .استاذنت و هزيت روحي وخرجت
هي انا تصدمت..شبيه هذا هبل ما لقى حتى طريقة ولى يحب يعرس بي؟؟لا هذي قتلهم اسكتوا ..انا اكاك خليت امي وطلعت لبيتي قلتلها ما نحبش نحكي توة امي خليني نرتاح و نخمم و بعد تو نحكيو.انا غارقة في افكاري وهو طلبني قلي اسمعني من غير ما تتكلم ما يمشيش مخك لبعيد موش معناها ما خذيتش منك حاجة نحب ناخذها بالعرس.لا انا نحبك ملكي واكهو اعطينا فرصة نكونو اصحاب ما تتعاركش معاي و نقص من لسانك و ما تفهمنيش بالغالط خلينا نعرفو بعضنا.اما راهو حبيت ولا كرهت راك مرتي و اذا كان ما تكونش لي عمرك ما بش تكون لحد
اعتبرها هدنة حتى تقرر.قتلو باهي ابعد علي هالايامات ما تستفزنيش وخليني ناخذ قراري من غير ضغط .قلي باهي انا بش نسافر بعد غدوة في ايدك الجمعة هذي .و علق بت في ليلة ما نعرفش كيفاه
ايمن:لميت روحي وقراري خذيتو فيسع يلزمني ناخذها حبت ولا كرهت وخلطت عليها وطلبتها من امها وكلمتها هي .انا ما نعرفش نحكي برشا المفيد نوصل للي حاجتي بيه.ومتاكد موش بش ترفض خاطر حتى بالغصب ماخذها ماخذها.
مي انا وهذاكا فرد دار وفرد بيت وهو راجلي....لا يلزمني نعمل اجتماع مغلق بروحي اما الكلمة اللي سابقة حتى درسي للموضوعي وقراري هي لا..ما نعرفش علاش رافضة الفكرة اصلا..خليني نغمةعلى راسي و نرقد خير يبيتها في شان و يصبحها في شان .رقدت بعد عذاب وانا نتقلب من كل شيرة و جانب.
من غدوة مشيت للخدمة فرحوا بي منى و سامي و يسالوا ويعاودوا اش فمة و اش صار وانا كلمة وقص.نعرفو راهو يعس و يسمع في. ما لقيتش برشا خدمة و ما ورانيش وجهو وانا كل دقيقة نهز راسي نفركس عليه بش يطل زعمة ولا... فمة وحش غريب .جا وقت الراحة سامي قال نقعدو ما نخرجوش وانا بيدي جبت ماكلتي معاي و حتى منى .قعدنا نفطرو شركة و سامي قلي:مي انا في بالي بش ترجع غدوة ياخي هاك جيت .كنت نستنى فيك على موضوع . غزرتلو نستنى فيه يكمل.واصل كلامو قدام منى :انا حبيتك من اول نهار ريتك فيه و نحب نجي نخطب اش قلت؟ .... انا تفاجات وه ما اقوى سعدي زوز عروض زواج ما بين ليلة ونهار .قص علي هو حبل افكاري و قلي خوذ وقتك و جاوبني .ومنى تتبولد قتلي ايا نزغرد؟ هي ما كملتش و يدخل ايمن تقول اعصار داخل الشرر يطاير من عينيه و يهز و ينفض سامي نفضة وحدة و يرميه يجيبو في القاعة وقلو: كلمتين ما نزيدهمش ما تحبش تقطع خبزتك تبعد على مي .هذيكا مرتي انا. غزرولي الزوز باهتين كينهم يسالو في وقتاه وكيفاه .و هو قحرلي عبارة يقلي اياك حتى تخمم و خرج. اعصابي توترت هزيت صاكي و روحت
شنية هذا تي هاو ما جاوبتوش و هو مقرر و موش معبرني..تي بش يستعبدني هذا..ياخي مناقصة هي بش ياخذها مهما كان ولا شنية...ما فهمتش حسيتو حب تملك لا اكثر ولا اقل و فمة حاجة في مخي تقلي ابعدك منو ما توافقش و بونتو فيه وافق على سامي .قلبي يقلي لا هو اللي في قلبك و مخك..زعمة انا حبيتو؟ لا لا ما نظنش ...مالا بش تفسر نبضك اللي يتضاعف وقتلي تراه..بش تفسر بهتك فيه و لمعة عينيك كتراه؟ ولا كتخوض كتشوفو زلا بوستو اللي حركت فيك حاجات ما تعرفهاش...من غير ما نشعر هزيت التليفون وكلمتو حسيت فرحة في صوتي كيكلمتو: اهلا بيك.عندك ما تقلي؟جاوبتو و بدني بكلو يخض: ايه سي ايمن حبيت نقلك اللي مانيش موافقة على عرضك .جبد نفس طويل وقعد ساكت اما حسيت كان جيت بحذاه راهو كركرني من شعري و غفصني جاوبني ببروووود:مالا عاجبك سي سامي متاعك و موافقة عليه؟قتلو:ممكن .علق وضحكت هههههههه نبزة قوية تعاود تقلبلو الموازين الكل
منعرفش كيفاش اما والله حسيت بفرحة شماتة فيه خاطر يسخايل كل حاجة يحب عليها ياخوها .وزيد فرصة مسافر موش بش يخلط يرد الفعل اما ما كنتش نتصور بش يكون ردو مزلزل اكاكا.
هو:قلت خليها على راحتها ما نضغطش عليها خلي تخمم براحتها ووصيتهم الخدمة برشا لا . في الراحة قعدت نتفرج عليها و نسمع في سي الشباب يطلب في يدها وقدام عيني...نرعش وكان لقيت راني غفصتو اما يجيش في شركتي .نبهت عليه يتسمى بلطف بش ما يدورش بيها و زيد قتلو مرتي بش حتى التخمام فيها لا. كلمتني فرحت وقلبي رعش بالفرحة زعمة اش بش تقلي.وكانتلي صدمة انا رفضتني من حياتها ..انا قتلي لا..ولاخر ممكن..؟؟؟وكان جات قدامي راني ...اما ميسالش الايام بيناتنا تو نعرف كيفاه نجيبها حتى مغصوبة ما يهمنيش..
تكتكت ولقيت الحل خليها تخدم توة براحتها ماهو وفى ستاجها و تتولى المالية تو نجيبها.
هي:وفى الستاج و سي محمد سلملي المالية ومشى على روحو بعد ما عملولو حفل تكريم تعدى فيه جو محلاه و اثر فينا خروجو .المفيد بدات الخدمة بالرسمي ميزانية كبيرة كانت قدامي و اوراق وكمبيالات و شيكات اما كنت نخدم مريقلة كالمنقالة في اختصاصي وزيد ساعدني اني ما ريتوش جمعة كاملة .اما بيني و بين روحي عميت بالوحش عليه توحشت ريحتو خيالو...شعرو عينيه بحري اللي نعوم ونغطس فيه ...و في غيابو اكتشفت حبي ليه قلبي اللي ينبض باسمو خلع باب قلبي و تربع بلا اشن مني ..برغم تسلطو و برغم ما عملش معاي الباهي كل شي عملو معاي يزيد ينفرني منو اما انا العكس لقيت روحي نزيد نقرب و نقرب حتى غرقت...لقيت روحي نستنى فيه بش نقلو موافقة و تو كل شي يتغير فيه بالشوية ...ما كنتش نتصور اللي هو بش يعملي عملة كيف اللي بش نحكيلكم عليها.... وكانت الجمعة هذيكا هي الهدوء اللي يسبق العاصفة...
انا في الدار و تليفوني ضرب ضربة قلبي معاها تخلع حسيت حاجة جايتني تفجع هزيت نلقاه نومرو سكرتاريا الشركة قالولي حضر روحك جايتك الكرهبة متاع الشركة بش تجيبك حاجتهم بيك اكيد
هي :سالت اش فمة قالولي ما نعرفوش لبست سرفاتي و سبادري و كبوطي شعري ملموم و خرجت مع جيان الكرهبة .وصلنا اضواء الشركة الكل تشعل و البيروات فارغة حسيت قلبي تقبض ...دخلت ديراكت لبيروه لقيتو يمشي و يجي في البيرو حسيت بفرحة كشفتو و برعشة كيف الطير كينفض جناحاتو فرحان بش يطير...اما فرحتي ما كملتش ...سالتو بلساني اللي ما يهنينيش ديما:ياخي اللي بش تقولهولي ما يصبرش لغدوة؟جايبيني ساقي اعلى من راسي... قلي اترص الساعة و حط قدامي دوسيات و قلي شيكات بميات الملاين ما فماش انت وين؟هذا مامنينك على اموال الشركة؟؟؟مخي وقف و ووليت نوكوك الحكاية فيها فلوس معناها اكانتي في الميزان؟؟؟معناها انا متهومة بالسرقة؟؟؟ هزيت راسي و عيني معبية بالدموع موش مصدقة ...مسني في اي حاجة الا اخلاقي اللي تربيت عليها ...انا سارقة؟؟؟ قتلو بجراة كيفاش هاني خدمت و نظمت دوسيات و شي ماهو ضايع؟؟قلي انت المسؤولة قدامنا سوا نت ضيعت ولا غيرك هز .انت اللي تتحمل المسؤولية الكل..وقفت و شعري تحل متمرد كيف صاحبتو هههه و حسيتو غزرتو تشتت مع وقفتي و شعري قتلو انا نعيط:لا هذي قالتلهم اسكتو دورتها بش تشدني من يدي اللي توجعني و رجعت دموعي خبيتهم والله ما يفرح بذلي..اتكى على كرسيه وقلي انت اللي حبيت جيتك بالسياسة ما حبيتش ما قعدلي كان هكا..قدامك خيارين يا تقبل تعرس بي و الجمعة هذي زادة يا اما نعديها و تولي قضية وحبوسات
هو:نكلم فيها و قلبي يعصر علي نتظاهر بالقوة وقلبي دم عليها ريت دموعها كلمعت و رجعت ...مرا قوية اما حسيتها بش تتهد و يا ويلي من جبل كيتهد...
مي:موش مصدقة وما نجمتش نستوعب...معناها انسان بش يملك حد يعمل هكا في عوض بالمحبة والدلال يتصرف بالعنف و الجبروت و الظلم هذا الكل؟؟؟؟لبنات تجيهم دكلاراسيون متاع حب و انا سرقة؟؟؟اش عملت في حياتي راني ما اذنبت في حق حد ؟؟؟نطيح و نقوم برغم ضربات الزمان الوجاعة بكل صبر اما هذي ضربة قصمتلي ظهري ومن شكون من انسان هو حب حياتي....
بركت في الكرسي و قتلو باهي موافقة على العرس اعمل كيما تحب و يمين البكوش في صدرو ...من تو انت شرطت وانا زادة نشرط ما نحب حتى شي من عندك و بعمرك لاك بش توصل تحط علي يدك...سكت وقلي المفاهمة مع امك موش معاك.قوم نوصلك ونحكي مع زهيرة.
ركبت في الكرهبة واضواء الشركة طفات كقلبي اللي غاطس في الظلام.لفت وجهي للشباك و دموعي تجري من غير ما يلذلي و ما نجمتش نشدها ...دموع القهر و الذل من حب عمري....وصلنا طلعت لبيتي و خليتو هو وامي .ناداتلي زهيرة حتى عيات و طلعتلي قلتلها امي اتفاهم انت وياه و اللي تعملو مبرووك.ما حبيتش نحكيلها و نوجعها ميمتي موش ناقصة .خليها تفرح بعرس بنتها.قلها ما تجيب شي و ما تشقيش روحها انا نقوم بالعرس الكل .كلمني بش نمشي انا وامي وامو نختار الموبل و الحوايج رفضت ياخي كلمتني امو قتلي جاية تهزنا .محلاها خالتي بية مرا تتحط على الجرح يطيب عكس ولدها تبوس وفي و تعنق و تقلي نهار سعيد اللي رضى ولدي يعرس ..وامي تزغرط .خرجنا اختاروا هوما ما عندي ما اخترت وما عينيش .
بدات ايامات العرس حنة وحرقوس ولمة وتزغريط .امي فزعت علينا الناس ..ماحسيتش بالفرحة كنت كالميت يسوقوا فيه لغاسلو .جا نهار الصداق ما كلفتش روحي برشا لبست قفطان ابيض سيبت شعري شوية كحل و قلوس ربي هبط سرو وقعدت نستنى فيه يجي هو واهلو والعدل.بخور يعجعج و الدنيا معبية و الناس تستنى و انا قلبي يقطر بالدم...
جاوا بالزمامر و كورتاج اللي يقلك ايمن ولد...دخل ما نجمتش نهز راسي عيني معبية بالدموع قعد في وسط الرجال بدا العدل قال هو موافق وصحح جاوني انا قلت موافقة ما نعرش كيفاش طلعت من فمي ....صححت و دموعي تسيبت وامي تحمل في و تبوس و تبكي وتقلي توة تهنيت عليك وانا في قلبي اي امي شنية هنا .جاني ايمن غزرلي في عيني اللي كلها لوم وكره باسني من جبيني وحط فوق الطاولة 3صياغات موش كتجيب ذهب الدنيا شي ماهو بش يعوضلي فرحة عمر اي مرا حماتي لبستني خواتم و فرادي تعد تغلط وتعنق و تبوس فرحانة اك حدها .روحوا زانا نستنى وقتاه يخرج علي .كملت السهرية وطلعت لبيتي نرتاح حملت مخدتي و بكيت حتى شبعت طلبني ما حبيتش نهز عليه بعثلي مساج مبروك علي يا احلى عروسة في الدنيا..
جا نهار العرس تعدا في الحجامة هو ريقل كل شي روبة و حجامة ما نعرفش انا حتى وين جاتني الكرهبة هزتني...ما اهتميتش باي حادة قتلها اللي تحب تعملو اعملو خلاتلي شعري بلونو مع كعبات ماش .عملت مجهودها ووقتاللي وقفت على المرايا ما عقلتش روحي ...اما لشكون كحلت باطل زينت باطل...واحد اعمى ما يعرفش يتعامل معاي ...
جاني بالزمامر و الهلالو والله ما نعرف صالة ولا اوتيل ما يهمنيش هو يهمو خاطر وزنو في البلاد اما كانك علي ما نحب حتى شي منو ...خرجتلو هو وقف باهت موش باهتا مبهور ملايكة تمشي على الارض جمال رباني سبحان اللي خلق و صور حسيت روحي نقز بش نخلطلها ...هي محلا زينو زين رجولي طول و قد و شبوبية اللهم صل عالنبي و كوستيم يفتق ...ووه هاني نتغزل بيه و انا نكرهو كره العمى
شدلي يدي و ما تكلمش حتى كلمة يغزرلي و عينيه بش تاكلني في قلبي قتلو تعيا وانت تقبض .. طلعني في الكرهبة وصلنا للاوتال سهرية على البيسين زهيرة تزغرط و تصلي عالنبي تعدات سهرية عرس كيما اي سهرية شطيح اجواء العادة و العوايد تفرهدت كيف شطحت مع عشيرتي سنسون .هو ما شطحش كان اللي حطوا سلو قاملي الحاضرين في البيست الكل وخروا قعدت كان انا وياه الضو خفت
لف ايديه علي و قربني ليه حتى لصقتلو كابس علي تقولش خايف لا نهرب وانا بيني و بينكم كان لقيت كيفاه راني عملتها. باسني من جبيني و بدينا نتمايلو .عمري ما شطحتها هالشطحة هذي اما لقيت بدني يتبع فيه منسجم معاه سوبل ...بدني خاذلني يطاوع فيه راسي في صدرو نسمع في دقات قلبو ترج فينا الزوز رجان ... وليت نلهث و ما تجراتش نهز عيني فيه حتى كملنا و الكل يصفقوا ...كملت السهرية و امي جات تبوس في و تبكي و في وذني: عيش بنيتي هنيني ...ايه ايه امي اتهنى قلتلها ركبت وقلبي خليتو عندها و مشات بينا الكرهبة وقد ما احنا نبعدو قد ما قلبي يتخلخل....
------------------- نهاية الجزء 1